د ټرانسپورټ او هوایي چلند وزارت مسوولین وایي، تېر ۱۴۰۴ لمریز کال د هوایي او ځمکني ټرانسپورټ خدمتونو وړاندې کولو په برخه کې له لاسه ته راوړنو ډک و.
د دوی په خبره، د يادو لاسته راوړنو په ترڅ کې له ۲۷ هوایي ډګرونو څه باندې ۱۲زره کورنۍ او بهرنۍ الوتنې ترسره شوې چې په کې ۱.۶ ميليون تنه مسافر لېږدول شوي دي.
د دې وزارت ویاند حکمت الله اصفي وايي، ټرانسپورټ او هوايي چلند وزارت د خدمتونو لا پراختيا په موخه تېر کال شاوخوا ۱۷۰ بېلابېلې پروژې هم پلې کړې دي.
اصفي زیاته کړې: « د ټرانسپورټ او هوايي چلند وزارت تر اوسه د ۱۷۰ په شاوخوا کې هغه پروژې چې ځینې یې د تطبیق په حال کې دي او همدارنګه ځینې یې ګټه اخستنې ته سپارل شوې، تر کار لاندې نیولې دي. همدارنګه په ولایتونو کې هم زموږ تخنیکي ټیمونه بوخت دي، ترڅو په ولایتونو کې د ښاري ټرمینلونو لپاره ځمکې تثبیت کړي.»
د وزارت ویاند دغه راز وايي، د ټرانسپورټ او هوايي چلند وزارت په ټولو هوایي او ځمکنيو ټرمینلونو کې مالي، تدارکاتي او ادارې برخې برېښنايي کړې دي او دغه راز يې په ۲۰ زره ۲۲۲ نورو ټرانسپورټي موټرو کې هم د جيپياېس الې نصب کړې دي.
د ټرانسپورټ او هوایي چلند وزارت ویاند په دې اړه وايي: « د دوو کورنیو شرکتونو ترڅنګ، ۱۰ نړیوال هوايي شرکتونه هم زموږ هېوادوالو ته هوايي ټرانسپورټي خدمات وړاندې کوي. له نورو هېوادونو سره د راکړه وکړې، صادراتو او وارداتو لپاره کارګو هوايي مسیرونه یو له هغو مهمو برخو دي چې ټرانسپورټ او هوايي چلند وزارت ورته پاملرنه کړې. همدارنګه الکټرونیکي سیسټمونو ته هم ډېره پاملرنه شوې. د واټ ټرانسپورټ په برخه کې د موټرو نوبت ګیرۍ او پاس په ګډون، ډېری چارې الکټرونیکي شوې دي.»
خلک او د اقتصادي چارو شنونکي د وړاندې کېدونکو خدمتو د کيفيت ښهوالي غوښتنې ترڅنګ، د ټرانسپورت او هوايي چلند له لوري د پلې شویو پروژو هرکلی کوي او زياتوي، دا پروژې د مسافرو او توکو د انتقال په برخه کې ګټورې دي.
د اقتصادي چارو شنونکی عبدالنصیر رښتیا وايي: « افغانستان له وچې سره تړلی هېواد دی او نړیوالو اوبو ته لاسرسی نه لري. همدارنګه زموږ ځمکنی ټرانسپورټ هم له جدي ستونزو سره مخ دی. نو هر څومره ډېر چې موږ له هوايي ټرانسپورټ څخه ګټه اخلو، د هېواد پر اقتصاد مثبت اغېز لري؛ ځکه چې توکي د هوايي دهلېزونو له لارې په لږه موده او کم لګښت تر مقصد پورې رسېږي.»
د ټرانسپورټ او هوایي چلند وزارت تېرکال د ۸۶ زره موټرو تخنيکي ارزونه هم کړې او د معلوماتو له مخې يې، تېر کال د ټرانسپورټي خدمتونو د پراختيا لپاره ۱۸۵ شرکتونه ایجاد شوي چې ۱۲۵ بار وړونکي او ۷۰ هغه يې مسافر وړونکي دي.
دا مهال په ټول هېواد کې ۹۰۰ ټرانسپورټي شرکتونه فعالیت لري چې د مسافرو او د توکو لېږد رالېږد په برخو کې فعالیت ترسره کوي.
