د اروپایي ټولنې د پارلمان غړې هانا نیومن کابل ته راغلې او د اسلامي امارت چارواکو په ګډون يې له خبریالانو، د بشر او ښځو حقونو فعالانو سره لیدلي دي.
نیومن د یوه خبري کنفرانس پر مهال وویل، له افغانستانه د تلونکو لوستو ښځو او متخخصینو په اړه اندیښمنه ده او په خبره یې دا چاره د افغانستان راتلونکې لا په خطر کې اچوي.
نیومن ټینګار وکړ،چې اسلامي امارت پر خپل اوسني دریځ کلک پاتې او دا به د دې لامل شي،چې په افغانستان کې د بې وزله خلکو شمېر لا زیات شي.
نیومن زیاته کړه:« دا نجونې ښوونځیو ته نه ځي، په دې مانا ده،چې ښځو ته د زده کړو چانس او پیسو ګټلو چانس نه ورکول کیږي. دا په دې مانا ده،چې ټوله کورنی په بې وزلی کې ده او دا به د افغانستان بې وزلي نورو نسلونو ته هم وغځوي. زه فکر نه کوم،چې د
نړی هېڅ رهبر به داسې یو څه د خپل هېواد لپاره و غواړي،نو موږ هېله من یو،چې مثبت بدلون وګورو.»
ک نیومن وايي،ښځې په افغانستان کې د ځان لپاره راتلونکې نه ګوري او هغه کسان،چې غواړي دلته نوې سوداګري پیل کړي، له مبهم وضیعت سره مخ دي.
په ورته وخت کې هغې په افغانستان کې خبریالانو، ښځو او د تېر حکومت غړو په تړاو هم اندېښنه څرګنده کړه او زیاته یې کړه،چې دوی له هم نادرکه کیږي.
نیومن زیاته کړه:« ما دلته د لاریونکوونکو او خبریالانو پر وړاندې د تاوتریخوالي کیسې اوریدلي او دا مې اوریدلي،چې د تېر حکومت غړي نا درکه کیږي،چې اوسنۍ اداره یې نور نه غواړي. دا هغه څه دي، چې نړیواله ټولنه یې نه شي زغملی.»
نیومن وايي، لا هم په افغانستان کې د بشري مرستو رسولو ته ژمن دي، خو ټینګار یې وکړ،چې د دې مرستو دوام لپاره باید په افغانستان کې مثبتو بدلونونه وګوري.
هغې زیاته کړه:« موږ به هغه وخت خپلو بشري مرستو ته دوام ورکړو،چې په افغانستان کې مثبت بدلونونه وګورو. موږ څنګه کولای شو، د اروپا خلکو ته د دې پیسو لګولو توجیه ورکړو، کله چې په افغانستان کې نجونې ښوونځي ته نه شي تللی، کار نه شي کولی او د
دوی پیسو یوه برخه طالبان اخلي.»
هانا نیومن،چې په لومړي ځل یې افغانستان ته سفر کړی وايي،افغانستان کې د خلکو لپاره کار کول لا سختیږي او د دې وېره شته دی، چې دا هېواد خپل بشري پوټانسیل لا ډېر له لاسه ورکړي.
