پر خيبرپښتونخوا او افغانستان د پاکستان پوځي رژيم بريدونو په اړه لا هم په نړيواله کچه غندنې دوام لري. تازه د پښتون ژغورنې غورځنګ(پيټياېم) په يوه ليک کې بریټانیا ته دا روښانه کړې چې پاکستان له ترهګرۍ سره د مبارزې په پلمه په خيبرپښتونخوا او افغانستان کې ملکي تاسيسات په نښه او له منځه وړي.
دغه ليک د بریټانیا لومړي وزير دفتر ته سپارل شوی او په کې غوښتل شوي چې پاکستان په خيبرپښتونخوا او افغانستان کې له بريدونو راوګرځوي او په دې توګه د بېګناه افغانانو د وينو تويولو ته د پای ټکی کېږدي.
د پښتون ژغورنې غورځنګ یو تن غړی وايي: « موږ د پيټياېم بریټانیا څانګې له اړخه پر افغان خاوره د پاکستان تېري او افغان نسل وژنې د غندنې لپاره په بریټانیا کې د پارلمان مخې ته ستر لاریون ترسره کړ. موږ به په دې اړه د پاکستان د جنایتونو اسناد تر نړۍ ورسوو.»
د پښتون ژغورنې غورځنګ د لیک په سپارلو سربېره دا هم ويلي چې په نږدې راتلونکي کې به د پاکستان پوځي رژيم د ورته کړنو پر ضد په ځينو اروپايي هېوادونو کې اعتراضونه هم وکړي.
غړي يې ډاډ ورکوي چې په افغانستان او خيبرپښتونخوا کې به د عامو خلکو پر وړاندې د پاکستاني ظلمونو پر وړاندې غږ پورته کولو ته دوام ورکوي.
د پښتون ژغورنې غورځنګ د مرکزي کمېټې غړی زیرشاه آغا وايي:« د پاکستان د بریدونو خلاف د پښتون ژغورنې غورځنګ د نړۍ په مختلفو هېوادونو کې احتجاجونه کړي او د دغو هېوادونو حکومتونه ته یې د پاکستان خلاف لاسلیکونه هم سپارلي دي. څو ورځې وړاندې بريټانیا کې د شوي لاریون پرېکړه لیک هم د بریټانیا لومړي وزیر دفتر ته سپارل شوی.»
د پښتون ژغورنې غورځنګ د مرکزي کمېټې غړی خیرالله امین وايي: « دلته چې د ترهګرۍ په بهانه د پښتنو نسل وژنه کېږي، موږ د دې خلاف لاسلیکونه ورکړي. له کورونو د خلکو ایستل او بیا یې په ډېره بې رحمۍ وژل جنایت دی، دا جنایت په تېرا او کورمه کې هم ترسره شوی.»
دغه راز، د پښتون ژغورنې غورځنګ مشر او مطرحو غړيو هم پر تيرا او کرمې سربېره پر ننګرهار، کندهار، خوست، پکتيکا او کابل د پاکستان پوځي رژيم دوامداره بريدونه وحشيانه بللي او سملاسي يې د درولو غوښتنه کړې.
د پاکستان د دې بريدونو تر ټولو خونړی هغه يې په کابل کې پر نشهيي توکو د روږدو کسانو د درملنې پر مرکز بريد و چې په کې د رسمي شمېرو له مخې، ۴سوه کسان شهيدان او نږدې ۳سوه نور ټپيان شول.
