Skip to content
واک ته له رسیدو سره سم ولسونو سره د اسلامي امارت یوه ژمنه چې لا نه ده پوره شوې،په لویو مسایلو د پریکړې لپاره د علماوو او متنفذینو شورا جوړول ول،خو د اتو میاشتو په تیریدو تر اوسه پورې اسلامي امارت نه دی توانېدلی،چې شورا جوړه کړی.
د سیاسي چارو یو شمېر کارپوهان وايي، د اسلامي امارت چارواکي له ولس سره ژمنې کوي،خو عملي کوي یې نه.
د سیاسي چارو شنونکی سید هارون پاچا وايي:« دا چې طالبان ولې د شورا په جوړولو کې پاتې راغلي دي. لومړی خو دا ده،چې دا ټولو ته ښکاره ده،چې دوی (طالبان) تل وعده خلافي کړې. هره ژمنه یې چې له ملت سره کړې،دوی په هغې کې پاتې راغلي دي. دویمه مسله به دا وي،چې د دوی خپلمنځي ستونزې دي. همدا لاملونه دي،چې دوی (طالبان) په خپلو ژمنو کې پاتې راځي او پاتې راغلي دي.»
د شورا راغوښتل،چې ډېری غړي یې علماء دي، اسلامي امارت سره په کورني چوکاټ کې د مهمو مسلو حل په برخه کې ډېره مرسته کوي.
د سیاسي چارو کارپوهان په دې باور دي،چې چارواکي ولس سره ژمنو کې پاتې راغلي،خو اسلامي امارت په دې اړه له څه ویلو ډډه کوي.
د سیاسي چارو کارپوه اسماعیل غرنی وايي:« موږ ټول افغانان، ان یو شمېر طالبان هم، دا اته میاشتې پرله پسې ډول طالبانو ته همدا وړاندیز کوي،چې پرته له دې تاسو نه شئ کولای داخلي مشروعیت ترلاسه کړئ. خو طالبانو پرې خپل غوږنه کاڼه اچولي دي. ان ۱۵۰۰ کال دمخه هم د حل او عقد شورا جوړولو ته هم تیار نه دي، ځکه دوی (طالبان) وېریږي،چې زموږ د جبر او فشار لاندې له ولسه د ولسواکۍ کومه خبره ونه وځي. »
د اسلامي امارت له واک ته رسېدو وروسته ټول هغه بنسټونه له منځه تللي دي،چې حکومت سره یې د تګلارو په جوړولو کې مرستې کولې.
د سیاسي چارو کارپوه حسن حقیار وايي، د نړیوالو فشار او کورني مسایل د دې لامل شوي،چې اسلامي امارت ونهشي کړای، شورا را وغواړي.
حقیار زیاته کړه:« د اسلامي امارت په راتګ سره طبعا د طالبانو مشران ډېر مصروفه ول او مصروف دي، ځکه د نظام او سیسټم جوړښت کار غواړي. څومره چې زه خبر یم، همدا اوس اسلامي امارت د علماوو پر شورا کار پیل کړی دی. دغه راز نورې مشورتي شوراګانې هم تر کار لاندې دي.»
شنونکي ټېنګار کوي،چې اوس د علماوو شورا سربېره د بهرني سیاست د ټاکلو لپاره هم یوې اجماع ته اړتیا ده.
نږدې یوه ماشت کېږي،چې اسلامي امارت بهر کې د مېشتو افغان شخصیتونو سره خبرو او کابل ته د ستنېدو لپاره کمېسیون هم ټاکلی،چې د کار اغیز یې نه لیدل کېږي.
