د ملګرو ملتونو مرستندوی ماموريت يا يوناما له کلونو راهيسې په افغانستان کې د اوضاع څارنې، د بشري مرستو د همغږۍ او د حکومت-نړيوالو ترمنځ د ارتباط ساتلو په برخه کې کار کوي.
ټاکل شوې، چې د ملګرو ملتونو دې سياسي استازولۍ ماموريت د روانې مارچ په وروستۍ نيمايي کې پای ته ورسېږي، خو د دغه سازمان امنيت شورا وايي، چې د مارچ په ۱۶مه یعنې سبا ورځ به د يوناما ماموريت د تمديد په اړه چمتو شوې مسودې ته رايه ورکړي.
د دې مسودې د تائيد په صورت کې ټاکل شوې، چې د يوناما ماموريت تر درېيو نورو مياشتو پورې وغځول شي. هغه ماموریت چې شنونکي يې د وضعيت څارنې، د بشري مرستو دوام او له نړيوالو سره د اسلامي امارت ارتباطي پله په توګه موجوديت ګټور بولي.
د سیاسي چارو شنونکی فيض محمد ځلاند وایي: «افغانستان په تېرو پنځو کلونو کې له نړۍ سره د تعامل ډېر کم فرصتونه لرلي دي. لا هم د افغانستان حکومت د نړیوالې ټولنې له لوري په رسمیت نهدی پېژندل شوی. ملګرو ملتونو کې د افغانستان د دایمي استازي څوکۍ هم د اسلامي امارت استازو ته نهده ورکول شوې. له نړۍ او په ځانګړې توګه له ملګري ملتونو سره د افغانستان د نښلېدو یوازینۍ دریڅه، د دغه سازمان سیاسي استازولي یا یوناما ده.»
د سیاسي چارو بل شنونکی، توریالی ځاځی په دې اړه وایي: «د ملګرو ملتونو د سیاسي استازي په توګه افغانستان کې د یوناما شتون ډېر اړین دی. د اوسنیو ستونزو د حل لپاره له نړۍ سره د افغانستان د تعامل او اړیکو ساتل لپاره د دغه ادارې په اهمیت سترګې نهشي پټېدای.»
اسلامي امارت په دې اړه څه نه وايي، خو یو شمېر نور شنونکي ټینګار کوي، چې د یوناما د ماموریت راتلونکې چارې دې د افغانستان د ملي حاکمیت له اصولو سره سمې پر مخ یووړل شي.
د دوی په خبره، دا چاره به وکولای شي، چې د اسلامي امارت او یوناما تر منځ اړیکې او همکاري اغېزناکه او دوامداره کړي.
د سیاسي چارو شنونکی، اخترمحمد راسخ په دې اړه داسې نظر لري: «افغانستان لا هم دې ته اړتیا لري، چې یوناما باید دلته فعالیت وکړي. له نړۍ سره د افغانستان د اقتصادي، بشري او امنیتي وضعیت د شریکولو لپاره د دغه ادارې رول ډېر مهم دی.»
د راپورونو له مخې، د چین له لوري په یوه پرېکړهلیک کې تر یوه کاله په افغانستان کې د یوناما ماموریت د غځولو غوښتنه شوې، خو امریکا دا وړاندیز رد کړی او ویلي یې دي، چې دغه ماموریت دې اوس د درېیو میاشتو لپاره وغځول شي، څو د ا منيت شورا غړي هېوادونه د یوناما د ماموریت پر اغېزمنتیا بیا کتنه وکړي.
امریکا پر دې باور ده، چې د یوناما ماموریت د ملګرو ملتونو لپاره د نورو ماموریتونو پرتله ډېر لګښت لري او اغېزمنتیا یې باید وارزول شي.
بلخوا د امنیت شورا ډېرو غړو هېوادونو او د یوناما سرپرستې د یوه کال لپاره د دغه ماموریت د غځېدو ملاتړ کړی او اندېښنه یې ښودلې، چې د درېیو میاشتو غځېدل به يې د کارکوونکو ترمنځ همکاري کمه کړي.
