د ماشومانو له خوندیتوب ملاتړ اداره (سېف ده چېلډرن) وايي، پرافغانستان د پاکستان هوايي بریدونو او د دواړو لورو ترمنځ د وسله والو نښتو له امله، لسګونه زره افغان ماشومان له خپلو سیمو او کورونو بې ځایه شوي دي.
د ماشومانو ملاتړ یادې ادارې په یوه نوي راپور کې ویلي، د هغو ماشومانو شمېر چې د افغانستان په ختیځ کې د پاکستان پوځي رژیم بریدونو او د ډیورنډ فرضي کرښې په اوږدو کې د وسله والو نښتو زیاتېدو له امله بې ځایه شوي، ۶۸ زره تنو ته رسېږي.
سېف ده چېلډرن په خپل راپور کې زیاته کړې، ۱۳۴ زره نور ماشومان د دې ادارې له لومړنیو مرستو بې برخې شوي دي.
د اسیا لپاره د سېف ده چېلډرن ادارې سیمه ییز رییس ارشاد ملک ویلي: « لسګونو زره ماشومانو هغه څه له لاسه ورکړي چې د دوی ثبات او امنیت ټینګوي. دوی له خپلو کورونو بې ځایه شوي، ښوونیزو او روغتیايي خدماتو ته لاس رسې نه لري او خپل امنیت یې هم له لاسه ورکړی. له دې سربېره، یو شمېر ماشومان چې مرستو ته اړتیا لري، د جګړې له امله دا مرستې نه شي ترلاسه کولی؛ ځکه جنګ پر ماشومانو او د هغوی پر کورنیو ورانوونکی اغېز لري. د ماشومانو د خوندیتوب یوازینۍ لار د تاوتریخوالي بندول ده.»
ارشاد ملک دغه راز ویلي، د افغانستان او پاکستان ترمنځ د روانې شخړې له کبله هغه ۸ زره ماشومان هم له زده کړو بې برخې شوي چې د دې ادارې په ملاتړ ښوونځي ته تلل.
نوموړي له ۶ زرو زیاتو ماشومانو ته د روغتیايي خدماتو برابرولو ته په اشارې، له دواړو لوریو د اوربند غوښتنه کړې.
ارشاد ملک زیاته کړې: « موږ له ټولو اړخونو غواړو چې حالت عادي کړي او دا ډاډ ورکړي چې ماشومان به په هر حالت کې خوندي وي. د نړیوالو قوانینو په رڼا کې دا ټولو اړخونو ته خورا مهمه ده چې خپلو مسوولیتونو ته ژمن پاتې شي او د ملکي وګړو په تېره بیا ماشومانو امنیت خوندي کړي. دوی باید تاوتریخوالي بند کړي او اوربند ته سره ورسیږي.»
د ماشومانو له خوندیتوب ملاتړ ادارې په دی راپور کې ویل شوي، د فبروري میاشتې له ۲۶ مې نېټې راهیسې، د پاکستان پوځي رژیم په بمباریو کې ۵۶ ملکي وګړو ژوند بایللی او ۱۲۰ نور ټپیان شوي چې اکثریت یې ښځې او ماشومان دي.
په ورته وخت کې د بشري حقوقو فعالان بیا په جګړه کې د ښځو او ماشومانو په نښه کول له نړیوالو قوانیو او بشري اصولو سرغړونه بولي.
د بشري حقوقو فعال عبدالرزاق عدیل وايي: « د افغانستان په ختیځ کې د ماشومانو اوسنی وضعیت یوازې ساده بېځایه کېدنه نه ده بلکې د یوه ملت د انساني زېربنا تخریب دی. د افغانستان او پاکستان ترمنځ د جګړې ادامه د ډیورنډ فرضي کرښې په اوږدو کې داسې یو نسل تربیه کوي چې له قهر، دایمي اضطراب، د علمي او ټولنیزو مهارتونو له نه شتوالي سره مل لوېیږي. هغه ماشوم چې نن له واکسین، کافي خوړو او ښوونځي څخه پاتې کېږي، سبا ورځ له کمزوري دفاعي سیسټم او پرېښانه رواني حالت سره ټولنې ته ننوځي. که نړیواله ټولنه او د جګړې ښکېل لوري د مرستندویه بنسټونو غوښتنو ته پاملرنه ونه کړي، دغه ماشومان به نه یوازې د جګړې قربانیان شي بلکې له هر ډول امکاناتو به هم بې برخې شي.»
له نړیوالو ادارو سربېره، د افغانستان اسلامي امارت هم د پاکستان پوځي رژیم په ړندو بمباریو کې د لسګونو ملکي وګړو د مرګ ژوبلې پخلی کوي. دغه راز، په افغانستان کې د ملګرو ملتونو مرستندویه ماموریت(یوناما) هم د پاکستان په بریدونو کې د ملکي افغانانو مرګ ژوبله تایید کړې ده.
په دې اړه په تازه پېښو کې، وړمه شپه د پکتیا د ډنډ پټان ولسوالۍ په کوټ کلي کې د پاکستان پوځي رژیم په درنو ډزو کې یو ملکي کور په نښه شوی او په کې ۳ تنه ملکي وګړي شهیدان او درې نور ټپیان شوي دي.
