د ملګرو ملتونو امنیت شورا دوشنبه د شپې ناوخته د افغانستان په تړاو د یوې ناستې کوربنه وه. په دې ناسته کې د ملګرو ملتونو مرستندویه ماموریت ( یومانا) د سرپرستې جورجېت ګانیون د افغانستان د بشري، سیاسي، امنیتي او اقتصادي وضعیت په اړه معلومات وړاندې کړل.
په دې ناسته کې د نورو مسایلو ترڅنګ د افغانستان او پاکستان ترمنځ روانه جګړه او دواړو لورو ترینګلې اړیکې هم د اجنډا مهمه برخه وه چې د شورا یو شمېر غړو یې په اړه څرګندونې درلودې.
د هند استازي پر افغانستان د پاکستان هوايي بریدونه وغندل او په یو وخت کې یې له یوې خوا د نړیوالو او اسلامي قوانینو د درناوي خبره او له بلې خوا يې پر ملکي افغانانو بریدونه د اسلاماباد دوه مخیتوب وباله.
د هند استازي د ملګرو ملتونو سرمنشي د هغه راپور ملاتړ کړی چې په کې نړیوالو قوانینو ته پر درناوي، د مکلفیتونو د اداینې او د ملکیانو پر خوندیتوب په کې ټینګار شوی.
پروتانېني هرېش زیاته کړې: « هند پر افغان خاوره هوايي بریدونه په کله غندي. دا بریدونه په واضېح ډول د نړیوال قانون، د ملګرو ملتونو منشور، د دولتونو د حاکمیت اصل ښکاره سرغړونه ده. دا دوه مخیتوب ښيي چې له یوې خوا نړیوالو قوانینو او د اسلامي یووالي خبرې کېږي، خو له بلې خوا د روژې په مبارکه میاشت کې پر ملکي وګړو بې رحمانه هوايي بریدونه کېږي چې له امله یې د مارچ تر شپږمې پورې ۱۸۵ بېګناه کسان وژل شوي چې ۵۵ سلنه یې ښځې او ماشومان دي.»
همدارنګه روسیې د کابل او اسلاماباد ترمنځ د تاوتریخوالي او جګړې پر زیاتېدو خواشیني ښودلې. امنیت شورا کې د دې هېواد استازي ډېپلوماټیک مسیر ته د وضعیت راګرځېدو پر اهمیت ټینګار کړی او په دې برخه کې یې مرستې او ملاتړ ته چمتووالی ښودلی.
واسلي نبنزیا ویلي: « روسیه د افغانستان او پاکستان ترمنځ د تاوتریخوالي او جګړو پر زیاتېدو خواشینې ده. دواړه هېوادونه سره ملګري دي، موږ سیاسي او ډېپلوماټیک مسیر ته د وضعیت د راګرځېدو پر اهمیت او ارزښت باور لرو او موږ له خپلو ملګرو هېوادونو سره مرستې او ملاتړ ته چمتو یو.»
بل پلو، د برېټانیا استازې د کړکېچ پر زیاتېدو اندېښنه ښودلې او د ستونزو پر کمېدو او د خبرو اترو د پيل غوښتنه یې کړې.
د مهارتونو، ښځو او برابریو په چارو کې د بریټانیا د دولت وزیرې هان برونیز سمېټ ویلي: « بریټانیا د افغانستان او پاکستان ترمنځ د کړکېچ پر زیاتېدو ژوره خواشیني ښيي. موږ د دواړو هېوادونو ترمنځ د ستونزو پر کمېدو او د خبرو او منځګړیتوب له لارې د تعامل او خبرو اترو غوښتونکي یو.»
د چین استازي بیا له دواړو خواوو غوښتي چې له احتیاط او زغم کار واخلي او اوربند ته د رسېدا لپاره هڅې ګړندۍ کړي. فو کونګ ویلي، هېواد یې له دې وړاندې د افغانستان او پاکستان ترمنځ د منځګړیتوب هڅې کړې او راتلونکي کې به هم د وضعیت په ښه کېدو او د اړیکو پیاوړتیا برخه کې پر رغوونکي رول لوبلو ټینګار ولري.
ملګرو ملتونو کې د چین استازي دغه راز ویلي: « د افغانستان او پاکستان ترمنځ د وروستیو شخړو زیاتېدو دواړو خواوو ته درنه مرګژوبله اړولې. چین له دې درکه سخت خواشینی او اندېښمن دی. موږ پر دواړو لورو غږ کوو چې له احتیاط او زغمه کار واخلي، په چټګ او مناسب ډول اوربند ته ورسېږي او ټولې ستونزې او توپيرونه د خبرو او مذاکراتو له لارې حل کړي. چین د خپلو چینلونو له لارې په فعالانه ډول د افغانستان او پاکستان ترمنځ د کړکېچ د حل لپاره منځګړیتوب کړی او دېته چمتو دی چې د وضعیت د ښه کولو او د اړیکو د پیاوړتیا په برخه کې رغوونکی رول ولوبوي.»
په ورته مهال، ملګرو ملتونو کې د تېر نظام استازي په دې ناسته کې له پاکستان غوښتي چې پر ملکي سیمو او بنسټونو بریدونه ودروي او دغه کړنې یې د افغانستان ځمکنۍ بشپړتیا، د ملګرو ملتونو منشور او نړیوالو قوانینو سره په ټکر کې بللې دي.
د قطر لومړي له سکای نیوز سره مرکه کې له افغانستان او پاکستان غوښتي چې جګړه ودروي، خبرو ته کېني او ترمنځ اختلافات د خبرو له لارې حل کړي. شیخ محمد بن عبدالرحمن الثاني د دواړو هېوادونو ترمنځ د جګړې دوام د سیمې لپاره خطر بللی.
