د ننګرهار مهمندرې ولسوالۍ ٢٩ ویالې اوسېدونکي وايي، د پاکستاني پوځي رژیم الوتکو د ملکي وګړو پر کورونو بمباري کړې او خلکو ته یې مرګ ژوبله اړولې ده.
په دغو بریدونو کې د یوه نښه شوي کور خاوند روحي جان وايي، د حبیب الله په نوم یې یو زوی شهید او بل يي ژوبل شوی دی.
د ده په خبره، د دوی له کورنۍ سربېره د دوه نورو ګاونډیانو کورونه هم په نښه شوي او هلته هم مرګ ژوبله اوښتې ده.
د مهمندرې ولسوالۍ اوسېدونکی روحي جان وايي: « زه غریب سړی یم او له هېڅ ډلې سره تړاو نه لرم. د پاکستان ظالم پوځ د شپې په تیاره کې زموږ پر کور بمبار وکړ، یو زوی مې شهید او بل ټپي شو.»
روحي جان دغه راز زیاتوي، له هېڅ یوې ډلې سره تړاو نه لري او د ورځنۍ مزدورۍ له لارې کورنۍ ته نفقه ګټي.
دی له حکومت غواړي چې له پاکستاني پوځي رژیم څخه یې د زوی غچ واخلي.
روحي جان وايي: « زه له اسلامي امارت غواړم چې له پاکستان څخه زموږ د خلکو غچ واخلي او مناسب ځواب ورکړي.»
د ٢٩ ویالې یو شمېر اوسېدونکي هم وایي چې د وړمې شپې ټول بریدونه په ملکیانو شوي او د پاکستان پوځي رژیم تل ملکیان په نښه کوي.
د مهمندرې ولسوالۍ اوسېدونکی رحمن الله وايي: « دا ټول غریب خلک دي او له هېڅ ډلې سره اړیکه نه لري.»
د مهمندرې اوسېدونکی پروېز وايي: « دا خلک ټول ملکي وګړي دي، دوی په تېر کې هم ملکیان په نښه کړل. پاکستان چې څومره بریدونه کړي، ټول پر افغان ملکي وګړو شوي نه پر تحریکیانو.»
ولسونه دغه راز وايي، که اسلامي امارت ورته اجازه ورکړي، چمتو دي چې د سر په بدل له افغان دفاعي ځواکونو سره یوځای له پاکستاني پوځي رژیم سره جګړه وکړي.
د مهمندرې اوسېدونکی مصري خان وايي: « موږ له حکومت غواړو چې د دې خلکو غچ واخلي، یا دا چې موږ ته اجازه راکړي، ترڅو خپل غچ واخلو.»
د مهمندرې اوسېدونکی عبدالله وايي: « موږ هره لحظه د حکومت ملاتړ او د پاکستان پر وړاندې مبارزې ته چمتو یو. موږ د وطن دفاع لپاره سر ورکولو ته هم تیار یو.»
د مهمندرې اوسېدونکی رفیع الله وايي: « زه په دې سپینه ږیره چمتو یم چې ټوپک واخلم او پاکستان سره وجنګېږم.»
تېره اوونۍ هم د پاکستان پوځي رژیم الوتکو د ننګرهار په بهسودو، خوږیاڼو او شینوارو ولسوالیو کې د ملکي کسانو کورونه په نښه کړي وو چې له امله یې ٢٥ تنه شهیدان او زخمیان شول.
