د پاکستان د بهرنیو چارو وزیر د افغان سولې په تړاو د څلورو هېوادونو په سفر راوتلی دی.
د افغان سولې په تړاو د پاکستاني چارواکو بهرني سفرونو او ښکاره هلو ځلو ته په کتو افغانستان کې لیدلوری دا دی چې اسلام اباد غواړي د سیمې او نړۍ هېوادونو باور راخپل کړي.
پر پاکستان تور دی چې د افغان سولې پروسه کې د همکارۍ پر ځای خنډونه پيدا کوي او همدا لامل شو چې پر پاکستان ځینو برخو کې فشارونه وارد شول.
څلور هېوادونو ته د پاکستان د بهرنیو چارو د وزیر سفر د دې لپاره دی چې له ترهګرۍ سره مبارزه کې خپل رول ادا کړي او مرستې ترلاسه کړي.
د پاکستان د بهرنیو چارو وزیر شاه محمود قریشي دیکشنبې په ورځ قطر هیواد ته د افغان سولې په اړه سفر کړی و ، د دغه سفر موخه افغان سوله کې د پاکستان رول ښودل شوی دی.
قطر ته د بهرنیو چارو د وزیر له سفر سره یو ځای افغان شنونکي په دې باور دي چې پاکستان د نړیوالو له مجبوریتونو ګټه اخلي چې څنګه او په کومه پلمه ځنډیدلې مرستې ترلاسه کړي.
له دې سره یو ځای ځینې شنونکي بیا شک لري چې پاکستان له ترهګرۍ سره د مبارزې برخه کې ښکاره هڅې کوي چې له فشار ځان خلاص کړي، او پکار ده چې پر اسلام اباد د عمل تر وخته باور و نه شي.
قریشي د څلورو هېوادونو په سفر راوتلی چې څنګه کیدای شي د افغان سولې پروسه کې همکاري وکړي او د هېوادونو اجماع رامنځ ته کړي.
له دې سره یو ځای ټاکل شوې راتلونکې اوونۍ د پاکستان لومړی وزير عمران خان په همدې موخه قطر او ترکيې هیوادونو ته سفر وکړي.
