د هلمند په مرکز لښکرګاه ښار کې د کورنيو تولیداتو درې ورځنی ملي نندارتون پرانستل شو. په دې نندارتون کې له٤٠ زیات بېلابېل کورني توليدات په ٥٠ غرفو کې نندارې ته اېښودل شوي دي.
مسوولین وايي، د ياد نندارتون موخه د کورنيو توليداتو لپاره بازار موندنه او خلکو ته د دې توليداتو پېژندنه ده.
د هلمند صنعت او کانونو خونې رییس رحمت الله نظري وايي: « د اسلامي امارت له راتګ وروسته دا په هلمند کې دویم نندارتون دی او د هلمند خلکو ته یې زیاتې ګټې رسولې دي. د هلمند خلک او سوادګر کولی شي په دې نندارتون کې خپل تولیدات وګوري او بازار موندنه ورته وکړي.»
د هلمند سوداګرۍ او پانګونې خونې رییس غلام یحی پښتون وايي: « د حقمل په نوم دا نندارتون د هلمند خلکو او نورو کسانو ته د افغانستان او هلمند داخلي تولیدات ورښيي.»
نندارتون ته ورغلي صنعتکاران او خلک هم دا ډول نندراتونونه د کورنيو توليداتو د بازار موندنې په برخه کې ګټور بولي او د دوی د محصولاتو بازار موندنې د دوامداره کېدو غوښتنه کوي.
هغوي وايي، نړيوالو مارکېټونو ته د لارو نه لرلو له امله يې توليدات په کافي توګه د خرڅلاو بازار نه لري او قېمتونه يې هم د پام وړ ښکته شوي دي.
صنعتکار محمد طارق وايي: « دا ډول نندارتونونه ډېر ازرښت لري، زموږ توکي خلکو ته ورښيي او د صنعت لپاره بازار موندنه کوي.»
صنعتکار محمد اصف وايي: « دا ډول نندارتونونه زموږ د تولیداتو لپاره یو ډول تبلیغ دی. دلته له ښارونو او کلیو څخه خلک راځي او دا تولیدات ګوري او په دې پوهېږي چې اوس په افغانستان او د دوی په ولایت کې کوم توکي تولیدېږي.»
هلمند کې دا مهال د کورنیو تولیداتو د کارخونو شمېر له ١٥٠ اوښتی چي په بېلابېلو برخو کې تولیدات لري او شاوخوا ٦ زره کسان په کې په کار بوخت دي.
