دوی وايي، دا د افغانستان د رسمیت پیژندنې او امتیازاتو ترلاسه کولو لپاره نیک فال دی.
د سیاسي چارو کارپوه عزیز معارج وايي:« امریکا او اروپايي ټولنه او یا ناټو هېوادونه غواړي،چې افغانستان ته ډېر امتیازات ورکړي او ژر تر ژره دې سیمې ته راشي. مخکې له دې چې روسیه دې سیمې ته راشي، دوی ته تهدید جوړ کړي. نو دا د افغانستان لپاره ډېره ښه ده او په نیک فال باید ونیول شي،چې نړۍ خوشبیني وښيي او رسمیت پیژندنه وشي او افغانستان له منزوي حالته ووځي.»
یو شمیر نور بیا په دې اند دي،چې د اوکراین او روسیې له کړکیچ وروسته، افغانستان اوس د نړیوالو د لومړیتوب له لیست پریوتی دی او نړیوالې ټولنې د بل سرخوږي ختمولو لپاره نرمښت ته مخه کړې او تعامل غواړي.
د سیاسي چارو کارپوه قریب الرحمن شهاب وايي:« د نړیوالو لومړیتوبونه د اوکراین په جګړې سره نور هم تغییر شول او افغانستان اوس د نړیوالو له لومړیتوبونو قرار قرار په وتو دی. نو ځکه نړیواله ټولنه نه غواړي،په افغانستان کې اضافي سرخوږی ولري،نو د تعامل وړ یو ادرس دلته باید موجود وي. بل دا،چې د پسرلي په راتګ سره د شته خطرونو سربېره که طالبان خپله کورنۍ دنده په سمه توګه ترسره کړي،نو د لویدیځو له لوري د نرمښت تمه شته دی.»
