Skip to content
د اسلامي همکاریو سازمان د افغانستان په تړاو له خپلې پریکړې درې میاشتې وروسته د یکشنبې پر ورځ د « ۱۴۰۰ کال د کب پر ۱۵ مه» په کابل کې خپل دفتر پرانېست او ځانګړي استازي یې دنده پیل کړه .
یاد سازمان خبر ورکړی دی،چې د افغانستان لپاره ځانګړي استازي یې په کابل خپله رسمي دنده پیل کړې او هڅه به وکړي،چې له افغانانو سره د بشري مرستو په برخه کې خپل مسوولیت په سمه توګه ترسره کړي.
له دغه سازمان غوښتنه دا ده،چې د افغانستان دایمي ثبات،پرمختګ او د افغانانو ژوند ښه والي لپاره د اسلامي امارت له چارواکو سره په همغږۍ په سترو بنسټيزو او پراختیايي پروژو پانګونه وکړي.
د پوهنتون استاد فیض محمد ځلاند وايي:« د اسلامي هېوادونو د همکارۍ سازمان باید په افغانستان کې په پراختیايي پروژو کې پانګونه وکړي. افغانانو ته د کار زمینه برابره کړي، د طالبانو له مشرانو سره باید مرسته وکړي،چې سولې ټیکاو او پرمختګ ته لار اواره شي. په لویه کې باید د افغانانو ژوند ښه والي او ځان بسیاینې لپاره ځینې لوي پروژې باید ترسره کړي.»
د سیاسي چارو کارپوهان په دې باور دي،چې په افغانستان کې د اسلامي هېوادونو همکارۍ د سازمان لپاره د ښځو وضیعت ښه والی مهم و او د نجونو ښوونځیو او د پوهنتونو په پیل کیدو سره تر ډېره دغه ستونزه حل شوې.
دوی وايي، اوس باید په مستقیم ډول له دغه سازمان سره خبرې وشي،ترڅو له افغانستان سره د بشري مرستو جوړ شوي صندق ته پیسې ولیږدوي.
د سیاسي چارو کارپوه طارق فرهادي وايي:« د اسلامي هېوادونو لپاره په افغانستان کې د ښځو د وضیعت ښه والی مهم وو او دی.د نجونو د ښځوونځو او پوهنتونونو خلاصیدل یو له اساسي ګامونو دی، چې اخیستل شوی دی. له دغه سازمان سره باید بیا خبرې وشي او هغه وجهي صندق،چې دوی جوړ کړی وو، له افغانانو سره د مرستې لپاره پیسې ورته ځانګړې کړي.»
د تیر کال په ډيسمبر میاشت کې د سعودي عربستان پر مشرۍ د اسلامي همکاریو سازمان د افغانستان په تړاو په اسلام اباد کې ځانګړې ناسته رابللې وه او پریکړه یې دا وه،چې د بشري مرستو لپاره به په کابل کې دفتر پرانیزي او افغانانو ته د مرستو رسولو لپاره به وجهي صندق جوړوي،چې له دغې ناستې درې میاشتې وروسته یې اوس په کابل کې یې دفتر پرانېست او فعالیت یې پیل کړ.
