د سیاسي چارو شنونکی یحیی چاوش وايي:« په اوسنیو شرایطو کې ورو ورو افغانستان له نړیوالو هیریږي او د ملګرو ملتونو، نړیوالې ټولنې او شانګهای غړو هېوادونو د سازمان له پامه غورځي. د ملګرو ملتونو سازمان خپلې ټولې بشري مرستې او نورې همکارۍ اوکراین ته او د اوکراین کډوالو ته استوي. اوس مهال ورو ورو افغانستان د نړیوالو له پامه غورځيږي. زه هېله لرم،چې دغه حالت د افغانستان پر امنیت بدې اغیزې ونه کړي.»
یو شمیر نور بیا په دې اند دي،چې پر افغانستان د دغې جګړې اغیز ځکه زیات دی،چې د افغانستان اقتصاد پر بهرنیو هېوادونو متکي دی او اوکراین د یوه اروپايي هېواد په توګه اروپايي هېوادونو ته ډېر نږدې دی.
د سیاسي چارو شنونکی نازکمیر زیارمل وايي:« د اوکراین جګړه یوازې سیمه نه،بلکې ټوله نړۍ اغیزمنه کولای شي او دغه اغېز به یې تر ډېره پر افغانستان او ورته هېوادونو وي،ځکه د افغانستان اقتصاد له بهرنیو مرستو سره نښتی دی او د دغو مرستو ستر هېوادونه اروپايي هېوادونه دي. اوکراین هم چې اروپايي هېواد دی،نو کولای شي،چې د اروپايي هېوادونو ټول پام ځان ته واړوي.»
خو یو شمېر بیا په اند دي،ښايي د نړیوالو پام افغانستان ته وروسته له هغې را واوړي،چې د اوکراین قضیه یو طرفه شي،خو په خبره یې دا کار یو څه وخت ته اړتیا لري.
د سیاسي چارو شنونکی سید هارون پاچا وايي:« تاسې ګورئ،چې اوس د افغانستان په تړاو په بشپړ ډول نه رسنۍ خبرې کوي او نه د حکومتونو چارواکي، نو دا به وخت نیسې، تر هغې چې د اوکراین موضوع یو طرفه نه شي. واقعا افغانستان به له یو څه ستونزو سره مخ شي، تر هغې چې د اوکراین موضوع یو طرفه نه شي،نو فکر نه کوم،چې هېڅوک د افغانستان په اړه څه و وايي.»
اوس مهال چې افغانستان تر بل هر وخت ډېر نړیوالو اړیکو، بشري مرستو، رسمیت پیژندنې او اقتصادي همکارۍ او لاسنیوي ته اړتیا لري، دا ډول له پامه غورځیدل ورته سخت زیان اړوي.
