د اسلامي امارت رياستالوزرا له لوري ممتازو او مډال راوړونکو وزرشکارانو ته موټر او موټرسایکلونه د ډالیو په توګه ورکړل شول. دغو ورزشکارانو د بحرین په کوربهتوب د تنکيو ځوانانو په اسیايي او د سعودي عربستان په کوربهتوب د اسلامي هېوادونو د پیوستون په سیالیو کې له ځلېدو سره، د سرو زرو، سپينو زرو او برونزو مډالونه ګټلي وو.
پر ډالیو نازول شوي لوبغاړي وايي، د حکومتي چارواکو له لوري یې دا ډول ستاینه هڅوي چې د لا ډېرو وياړونو ترلاسه کولو لپاره سخت کار وکړي.
ورزشکار احمد فایض ابراهیمي وايي: « تر هغو چې زموږ په رنګونو کې وینه چلېږي، د هېواد او افغانستان لپاره به مبارزه کوو او ویاړونه به راوړو. د حکومت دا ډالۍ او هڅونه سبب کېږي چې موږ نور هم تشویق شو او له تېر څخه هم لس چند زیات سخت تمرینونه وکړو او ښې پایلې ترلاسه کړو.»
د تنکیو ځوانانو د فوټسال ملي لوبډلې غړی علي احمدي وايي: « دا ډالۍ ګانې، ستاینې او محفلونه موږ ته انګیزه راکوي چې د افغانستان په نوم لا ډېره سخته مبارزه وکړو.»
د المپیک ملي کمېټې چارواکي وايي، تېر کال د ورزش له پلوه د افغانستان لپاره له لاسته راوړنو ډک کال و او په خبره يې، ۲۰ کاله وروسته افغانستان وکولی شول له سترو نړیوالو سیالیو د سرو او سپینو زرو مډالونه راوړي.
دوی زياتوي، لوبغاړو ته د ورزشي تمرینونو ورکړې ترڅنګ، عقیدوي زدهکړې هم ورکول کېږي چې موخه یې په نړیوالو ډګرونو کې د افغانستان ښه استازولي ده.
د المپیک ملي کمېټې رییس احمدالله وثيق وايي: « د خدای شکر دی موږ سږ کال د ورزش په برخه کې بې مخینې لاسته راوړنې لرلې. شل کاله وروسته افغانستان دغه شان بې سابقې مډالونه ترلاسه کړل. شل کاله وړاندې د افغانستان ورزش یوازې یو د سپینو زرو مډال درلود، خو نن موږ له نړیوالو میدانونو د سروزرو مډالونه لرو. دا د افغانستان د ورزش په تاریخ کې لومړی ځل دی او د دې څرګندونه کوي چې اوسنی حکومت د ورزش تر شا ولاړ دی او ملاتړ یې کوي.»
د المپیک ملي کمېټې مسلکي او تخنیکي مرستیال احمد جان ځدراڼ وايي: « موږ ورزش ته د یوې ارزښتناکې ټولنیزې پدیدې په سترګه ګورو، د ملیتونو ترمنځ یې د اتحاد او اتفاق سبب بولو او کوشش کوو چې په اسلامي او افغاني روحیه سمبال ورزشکاران وروزو، ترڅو له یوې خوا په بهر کې د افغانستان ښه استازیتوب وکړي او له بلې خوا د ټولنې په اصلاح او پرمختګ کې هم د یوه روزل شوي ځوان په صفت بشپړه ونډه واخلي.»
ځينې نور چارواکي هم په نړيوالو ميدانونو کې د افغانستان ښې استازولۍ له امله د افغان ورزشکارانو هڅې ستايي او د حکومت له ادرسه د بشپړ ملاتړ ډاډ ورکوي.
دوی دغه راز له سوداګرو هم غواړي چې په راتلونکي کې د لا زياتو وياړونو ګټلو لپاره د ورزشکارانو ملاتړ وکړي.
د اسلامي امارت ویاند ذبیح الله مجاهد وايي: « موږ د کال په اوږدو کې د سپورټ او ورزش په برخو کې هم داسې ګڼ ویاړونه لرل چې افغانستان یې د نړۍ په کچه مطرح کړ؛ دا زموږ د ملت ګډ افتخار او ویاړ دی. د اسلامي امارت مسوولین دا خپله دنده بولي چې د هېواد مډال راوړونکي ځوانان د غوره بېلګو په توګه ومني او ملاتړ یې وکړي. دا د دوی حق دی چې ملت یې له هره پلوه ملاتړ وکړي او ویې هڅوي. زموږ خصوصي سکټور او شتمن کسان هم باید زموږ لوبغاړي تشویق کړي؛ ځکه تاسو پوهېږئ چې نظام په اقتصادي لحاظ ستونزې لري او نه شي کولی ټول بار اوچت کړي.»
د اسلامي امارت ریاست الوزرا دفتر بیا وايي، له افغان ورزشکارانو سره د افغانستان نوم تړلی او د لوبو ګټلو په صورت کې یې نړۍ د افغانستان د اتلولۍ په نوم یادوي. نو په همدې اساس حکومت ژمن دی چې له خپلو وزرشکارانو ملاتړ وکړي.
د ریاست الوزرا د دفتر رییس عبدالواسع وايي: « دا اتلولي یوازې د دغو کسانو نه ده بلکې دا د ټول افغانستان لپاره ده. دا ځکه چې که خدای مه کړه دا ورزشکاران په کوم میدان کې ناکامېږي، نسبت یې افغانستان ته کېږي او وايي، افغانستان ته یې ماتې ورکړه. که چېرې کامیابېږي، د بریا نسبت یې هم افغانستان ته کېږي او و ايي، افغانستان وګټله.»
د المپیک ملي کمېټه دغه راز وايي، هڅه یې دا ده چې د ورزش له لارې نړۍ ته د افغانستان ریښتینی او حقیقي انځور وړاندې کړي. د دې کمېټې د چاررواکو په خبره، موخې ته د رسېدو لپاره ۱ میلیون او ۳۰۰ زره لوبغاړي ورسره راجسټر دي او په ۵۲ بېلا بېلو ورزشي برخو کې پر تمرینونو بوخت دي.
