د کرنې، اوبو لګولو او مالدارۍ وزارت وايي، په سمنګان ولایت کې به دا نغدي او خوراکي(غنمو) مرستې هغو ۲ زره ۲۰۰ کورنیو ته ووېشل شي چې تازه له کډوالۍ راستنې شوي دي.
د کرنې وزیر عطاالله عمري په سمنګان ولایت کې د دغو مرستو د وېش پرمهال ویلي، هرې کورنۍ ته پنځه بورۍ غنم او پنځه زره افغانۍ په پام کې نیول شوي دي.
د کرنې، اوبو لګولو او مالدارۍ وزیر عطاالله عمري وايي: « په هر ولایت کې به څو زره هغو کډوالو ته چې ډېره اړتیا لري، مرستې ورسول شي. د همدغو مرستو د وېش لپاره موږ نن ستاسو په ولایت کې یو او څو سوه کورنیو ته به مرستې ووېشو. وروسته به والي صاحب او د هغه اړوند ټیم د مرستو وېش ته ادامه ورکړي.»
بله خوا، د سمنګان والي وايي، ډېر ژر به د تازه راستنو شویو کډوالو لپاره په ټاکل شوي ښارګوټي کې د ځمکو د وېش لړۍ هم پیل شي.
د سمنګان والي محمد شعیب رسالت وايي: « د امیرالمؤمنین په امر، په هر ولایت کې زموږ هغو راستنو شویو مهاجرینو ته ښارګوټی جوړېږي چې د روسانو له یرغل نیولې د امریکایانو تر یرغل پورې له هېواد څخه کډوال شوي دي. د سمنګانو د ښارګوټي لومړني کارونه هم پای ته رسېدلي او ژر به یې د وېش لړۍ پیل شي.»
راستانه شوي کډوال د دغو مرستو هرکلی کوي او پر دوام سربېره یې له ځايي چارواکو د کاري زمینې برابرولو غوښتنه کوي.
راستون شوی کډوال عبدالوارث وايي: « د ژمي په دې سړه هوا کې ډېره ښه وشول چې له موږ سره یې دا مرسته وکړه. په دې کې پنځه بوجۍ غنم او پنځه زره نغدې پیسې شاملې دي. موږ د دې مرستو له امله مننه کوو.»
راستون شوی کډوال عبیدالله وايي: « له موږ مهاجرینو سره یې مرسته وکړه، د دې لپاره مننه کوو. که له موږ سره د سرپناه جوړولو په اړه هم مرسته وشي، ډېر به ښه وي. همدارنګه موږ خپلو ماشومانو ته د زده کړو او تعلیم غوښتنه کوو. موږ غواړو چې له موږ سره مرستې زیاتې شي.»
د یادونې وړ ده چې د غنمو او نغدي مرستو دا وېش وړمه ورځ له بغلان ولایت څخه پیل شوی او ټاکل شوې چې ځینو نورو ولایتونو کې هم په پرله پسې توګه ووېشلې شي.
