د کابل په شهرنو کې پر یوه رسټورانټ چاودنه چې ۲۰ کسانو ته په کې مرګ ژوبله اوښتې، په کور دننه او بهر وغندل شوه.
پخواني ولسمشر حامد کرزي دغه چاودنه غندلې او په نتيجه کې يې پر اوښتې مرګ ژوبلې خواشيني څرګنده کړې. کرزي د پېښې قربانیانو له کورنیو سره غم شريکي کړې او ټپیانو ته یې د رغېدو غوښتنه کړې.
پخوانی ولسمشر حامد کرزي ویلي: « د کابل شهرنو په چینایي رسټورانټ کې د چاودنې له امله پر اوښتې مرک ژوبلې خپل ژور خپګان څرګندوم او دا برید غندم. د قربانیانو کورنیو ته د خپلې غمشریکۍ او ډاډګیرنې مراتب وړاندې کوم او ټپیانو ته د عاجلې روغتیا دعا کوم.»
په ورته مهال، د پخوانۍ ملي پخلاينې عالي شورا ریيس ډاکټر عبدالله عبدالله هم د چاودنې غندلو ترڅنګ، په کابل کې شوې چاودنه ترهګریز برید بللی او زیاته کړې يې ده چې دا ډول کړنې غیر اسلامي او انساني دي.
عبدالله د کابل نوي ښار په ګلفروشۍ کوڅه کې پر رسټورانټ شوې چاودنه د افغانانو د ارادې ضد عمل ګڼلی او د چاودنې قربانیانو له کورنیو سره یې غمشريکي کړې.
د ملي پخلاينې پخوانۍ عالي شورا ریيس ډاکټر عبدالله عبدالله ویلي: « په کابل کې د تېرې ورځې ترهګریز برید په کلکو ټکو غندم او دا ډول غير انساني اعمال د اسلام، انسانیت او د افغانستان د خلکو ارادې پر ضد ګڼم او د قربانیانو له کورنیو سره خپله خواخوږي څرګندوم.»
په همدې حال کې د پاکستان ولسمشر هم په کابل کې پر رسټورانټ شوې چاودنه غندلې او له امله يې پر اوښتې مرګ ژوبلې خواشیني څرګنده کړې. نوموړي دېته په پام چې په چاودنه کې يو چينايي وګړی هم وژل شوی، د افغانستان په بيا رغونې کې د چينايي وګړو هڅې ستايلې دي.
د پاکستان ولسمشر اصف علي زرداري ویلي: « ولسمشر اصف زرداري په کابل کې د چینایانو پر رسټورانټ چاودنه غندي او په دې پېښه کې د يوه چينايي وګړي د وژل کېدو ترڅنګ، پر اوښتې مرګ ژوبلې خواشني څرګندوي او د افغانستان په پرمختګ کې د چينايانو ونډه ستايي.»
شنونکي بیا دا ډول پېښې د استخباراتي کړیو کار بولي چې په خبره یې، د ټینګ شوي امنیت د خرابولو هڅې کوي، خو زیاتوي چې افغانان د هر ډول ترهګرۍ خلاف دي او د مخنیوي لپاره به یې يو موټی شي.
د سیاسي چارو شنونکی نجیبالله جامع وايي: « په پلازمېنه کابل کې پر رسټورانټ چاودنه نه یوازې ترهګریز او د انسان وژنې عمل او هڅه وه بلکې د پېښې عاملین باید پوه شي چې دوی نه شي کولی په دې ډول چاودونو سره د افغانستان اوسنی امن او عظمت وګواښي. افغانانو تل ثابته کړې چې ترهګري یې په هر لباس کې غندلې او د سولې خلک دي. د افغانستان دښمنان به تل په خپلو هڅو کې ناکام شي.»
د دوشنبې په مازدېګر د کابل په شهرنو کې د چینايي مسلمانانو او افغانانو پر رسټورانټ چاودنه وشوه چې د کابل امنیه قوماندانۍ مسوولانو په خبره، په دې چاودنه کې د عبدالمجید په نوم د یو مسلمان چینايي په ګډون ۷ تنه وژل شوي او ۱۳ نور ټپیان دي.
