د فریدالله په نوم ۲۸ کلن ځوان که څه هم د لیسانس تر کچې لوستی دی، خو دا مهال بېوزله او بې روزګاره ګرځي. فریدالله د جوزجان پوهنتون په ښوونې روزنې پوهنځي کې لوړې زده کړې کړې.
نوموړی له بیوزلۍ، بې کارۍ او خپلو اسنادو ته له کتلو ځورېږي. دی وايي، دا چې ځوان دی نو له ذهني فشارونو څخه د خلاصون لپاره يې د شبرغان ښار په یوه څنډه کې د شلو زرو افغانیو په پانګونې د خوراکي توکو پلورلو لپاره یوه غرفه کېښوده.
د ده په خبره، له دې غرفې څخه د خپلې کورنۍ پنځوس سلنه اړتیاوې پوره کولی شي. فرید له حکومت د کار او لاسنیوي غوښتنه کوي.
د جوزجان اوسېدونکی فریدالله وايي: « د جوزجان پوهنتون له ښوونې روزنې پوهنځي څخه فارغ یم. له دې دوکان څخه مې تر پنځوس سلنو د کور روزګار چلېږي، خو نور کوم عاید نه لري. په جوزجان کې د ځوانانو فقر او بېوزلي ورځ تر بلې زیاتېږي؛ زه له دولت غوښتنه کوو چې له لوړو زده کړو برخمن ځوانان په دولتي ادارو کې وګوماري.»
په دې ښار کې فرید یوازې نه دی بلکې په جوزجان کې لسګونه ځوانان شته چې د ده په څېر لوړې زده کړې لري، خو بې روزګارۍ ته زړه خوري.
د دوی اساسي غوښتنه داده چې لوستو او هغو ځوانانو ته په دولتي ادارو کې د کار زمینه برابره شي چې لوړې زده کړې لري.
د جوزجان اوسېدونکی فدا محمد وايي: « ډېر زیات ځوانان بې کاره دي او له بېوزلۍ ځورېږي. باید د ښځو او نجونو په ګډون ټولو ځوانانو ته د کار زمینه برابره شي. اسلامي امارت باید هغو ځوانانو ته د کار زمینه برابره کړي چې لوړې زده کړې لري.»
د جوزجان اوسېدونکی ولي الله وايي: « د افغانستان له اسلامي امارت غوښتنه کوم چې د جوزجان ځوانانو ته د کاري زمینې برابرولو ته پاملرنه وکړي. که څه هم دا هڅې اوس هم روانې دي، خو موږ غواړو نورې هم زیاتې شي، ترڅو ځوانان بهرنیو هېوادونو ته د تګ زړه ښه نه کړي.»
د جوزجان والي بیا له شمشاد ټلویزیون سره په ځانګړې مرکه کې د دې ولایت اوسېدونکو ته ډاډ ورکوي چې د ستونزو د حل لپاره به یې په وخت اقدام وکړي.
جوزجان والي عبدالله سرحدي وايي: « د ټولو افغانستان او په ځانګړې توګه د شبرغان او جوزجان خلکو ته اطمینان ورکوو چې د حکومت ملکي او نظامي مامورین ټول د دوی په خدمت کې دي او هر ډول ستونزو ته مو پام دی.»
دا په داسې حال کې ده چې تازه د اسلامي امارت لوړو زده کړو وزارت اعلان کړی چې له لوړو زده کړو فارغ مخکښ ځوانان به په دولتي ادارو کې په دندو وګومارل شي.
یوازې جوزجان نه بلکې د هېواد په اکثریت ولایتونو کې دا ستونزه شته او ډېري د لیسانس، ماسټرۍ او دوکتورا تر کچې لوستي ځوانان بې روزګاره په کور ناست دي.
