په هېواد کې د بې روزګارۍ کچې لوړېدو سره هممهاله، حکومت په روان لمریز کال کې لسګونه زره کسانو ته د کار انفرادي جوازونو وېشلو خبره کوي.
د کار او ټولنيزو چارو وزارت وايي، یوازې روان کال ۸۲ زره کسانو ته د کار جوازونه وېشل شوي چې له ډلې یې ۶زره هغه بهرني وګړي دي.
د دې وزارت مسوولانو دا نه ده روښانه کړې چې د کار انفرادي جوازونو ترلاسه کوونکو په ډله کې ښځې هم شته که نه؛ خو ډاډ يې ورکړی چې له ټولو ممکنه لارو د بې رزوګارۍ کمولو لپاره کار اخلي او د کار انفرادي جوازونو د وېش لړۍ به لا چټکه کړي.
د کار او ټولنیزو چارو وزارت ویاند سمیعالله ابراهیمي وايي: « له نېکه مرغه د ۱۴۰۴ هجري لمریز کال په بهیر کې له ۸۲ زرو څخه زیاتو هېوادوالو او بهرنیو وګړو ته د کار او ټولنیزو چارو وزارت له خوا د کار جوازونه وېشل شوي چې له ډلې یې ۶ زره تنه بهرني وګړي دي. د دغو کسانو تخصص، تجربې، مسلک او مهارت ته په خصوصي سکټور کې اړتیا لیدل شوې او د کار ګومارونکو په غوښتنه د کار وزارت له موافقې وروسته، افغانستان کې ورته د کار زمینه برابره شوې ده. د کار او ټولنیزو چارو وزارت هڅه دا ده چې د کار په بازار کې په امارتي او خصوصي ادارو کې د کاري جوازونو له لارې د کارګرانو حقوق خوندي او ستونزو ته یې رسېدنه وکړي.»
اوسمهال په هېواد کې د خلکو ډېره اقتصادي تکيه پر کرنه او بڼوالۍ ده، خو د اقلیمي بدلونونو او په ځانګړې توګه د وچکالۍ له امله د عايد دا سرچينه هم د وچېدو له خطر سره مخ شوې.
له دې سره، له ګاونډیو هېوادونو او خيبرپښتونخوا څخه د افغان کډوالو جبري ایستلو هم د کار موندلو کړۍ تنګه کړې او د نورو افغانانو په څېر یې تازه راستانه شوي هم له بېروزګارۍ سره مخ کړي دي. کار ته اړمن افغان وګړي له حکومت د کاري فرصتونو رامنځته کولو غوښتنه کوي.
کابل ښار ته یو تن تازه راستون شوی وايي: « موږ له حکومت غواړو چې له موږ سره مرسته او همکاري وکړي؛ ځکه موږ تازه راستانه شوي یو او داسې یو له ړانده او کاڼه، نه پوهېږو له کوم ځایه یې پیل کړو، لارې راته نه دي معلومې، کارونه راته نه دي معلوم او همداسې د ړندو په شان ګرځو.»
بل پلو، شنونکي هم په روان کال کې د کار انفرادي جوازونو وېشل ستايي او ډاډ څرګندوي چې د کاري فرصتونو پر رامنځته کېدو سره به بهر ته د کډوالۍ مخنيوی هم وشي.
دوی ټینګار کوي چې اوسنی حکومت دې بهرنیو پانګوالو ته په هېواد کې د بې روزګارۍ کچې راټيټولو لپاره د پانګونې شرایط لا اسانه کړي.
د سیاسي چارو شنونکی ادریس محمدي ځاځی وايي: « هغه افراد او اشخاص چې ګومارل شوي، باید نوملړ یې جوړ شي چې څوک چېرته او په څه بوخت دي. همدارنګه په دې اړه د شمېرو معلومولو ته اړتیا ده چې څومره ځوانان وزګار دي، ترڅو د کار ځای ورته پيدا شي. دا په راتلونکي کې د احصایې اخستلو لپاره یو ښه بعد دی.»
له دې وړاندې د کار او ټولنیزو چارو وزیر منلې وه چې په هېواد کې بې روزګاري د افغانانو جدي ستونزه ده، خو ډاډ يې ښودلې و چې په کوردننه او بهر افغانانو ته د خوندي کاري فرصتونو رامنځته کولو هڅې تېزې شوې دي.
