چین او پاکستان هوکړه کړې چې د افغانستان په مسئله کې به نږدې اړیکې پالي او په ګډه به د نړیوالې ټولنې له لارې اسلامي امارت وهڅوي چې په افغانستان کې ټولګډونه سیاسي جوړښت رامنځته او خاوره يې د نورو پر ضد ونه کارول شي.
دواړو هېوادونو په يوې ګډې اعلاميه کې ویلي، د نړیوالې ټولنې له لارې دا هڅه هم کوي چې اسلامي امارت معتدل سیاستونه غوره او په افغانستان کې د تلپاتې پرمختګ لپاره له نړیوالې ټولنې سره مدغم شي.
دا ګډه اعلاميه د پاکستان او چين د بهرنيو چارو وزيرانو د خپلمنځي سټراټيژيکو خبرو اترو اووم پړاو له پای ته رسېدو وروسته خپره کړې. د دې خبرو اترو لپاره د پاکستان د بهرنيو چارو وزير اسحاق ډار بېجينګ ته تللی و.
د پاکستان او چین بهرنیو چارو وزارتونو اعلامیه کې راغلي: « دواړو خواوو هوکړه وکړه چې د افغانستان په اړه به نږدې اړیکې ساتي او همغږي به سره کوي. همدا راز به له نړیوالې ټولنې سره همکاري وکړي، ترڅو اسلامي امارت وهڅوي چې يو ټولګډونه سياسي چوکاټ رامنځته کړي، معتدل سياستونه غوره، پراختيا ته لومړيتوب ورکړي، له ګاونډيو هېوادونو سره د ښه ګاونډيتوب پاليسۍ تعقيب کړي او په افغانستان کې د تلپاتې پرمختګ د ترلاسه کولو او له نړیوالې ټولنې سره د مدغم کېدو په برخه کې رغنده رول ولوبوي.»
په دې اعلامیې کې ټينګار شوی چې بايد د افغانستان خاوره د کوم بل هېواد پر ضد د فعالیتونو لپاره ونه کارول شي.
اسلامي امارت د پاکستان او چین ګډې اعلامیې ته غبرګون نه دی ښودلی، خو په تېر کې یې په ځلونو ویلي چې هېچاته اجازه نه ورکوي د افغانستان له خاورې نورو ته زیان ورسوي.
په اعلامیه کې دواړو لورو ژمنه کړې چې د چین–افغانستان او پاکستان د بهرنیو چارو وزیرانو درې اړخیز ډیالوګ او همدارنګه د چین– بنګلهدېش او پاکستان د همکارۍ له میکانېزم څخه به لا ډېره اغېزناکه استفاده وکړي، څو نوې او عملي پایلې ترلاسه شي.
د چارو څارونکي بیا وایي، پاکستان هڅه کوي د چین له لارې پر افغانستان خپلې نامعقولې غوښتنې او اندېښنې ور وتپي.
د سیاسي چارو شنونکی معین ګل څمکنی وايي: « افغانستان له بل هر وخت اوس یوه ښه مقتدر حکومت لري. دا حکومت پر ټول افغانستان واکمن دی او قوانین یې پلي کېږي او له هېوادونو سره ښې اړیکې لري.»
د پاکستان او چین په ګډې اعلامیې کې هم دواړه خواوو يو ځل بيا د ترهګرۍ پر ضد د صفر زغم پاليسۍ پر تعقيب ټينګار کړی او هوکړه یې کړې چې د ترهګرۍ ضد او امنيت په برخو کې هراړخيزې همکارۍ نورې هم ژورې کړي او د چين–پاکستان د کمربند او سړک نوښت د خوندي او روان پرمختګ لپاره ګډې هڅې وکړي.
د سیاسي چارو شنونکی خلیل احمد نادم وايي: « چین د خپلو او پاکستان د خپلو ګټو په لټه کې دي. پاکستان د افغانستان په تړاو یو ازمویل شوی هېواد دی او له افغانستان سره یې ډېر ظلمونه کړي. اوس افغانستان ته په کار ده چې له داسې هېوادونو سره دوستي وکړي چې هم د افغانستان په ګټه وي او هم د هغه هېواد.»
د پاکستان او چین بهرنیو چارو وزارت داسې مهال ګډه اعلامیه خپروي چې په وروستیو څو میاشتو کې د پاکستان دننه د چین یو شمېر لویې پروژې د امنیتي ګواښونو له کبله له ننګونو سره مخ دي.
په پاکستان کې دننه او بهر بحثونه بیا دا دي چې په دې هېواد او تر کنټرول لاندې سيمو کې يې د روانو ناامنیو تر شا د دې هېواد پوځ لاس لري او غواړي چې د امریکا خوشاله ساتلو لپاره د چین پروژو پر وړاندې تهديد ایجاد کړي.
