د کندهاراحمدشاه بابا نړیوال هوايي ډګر کې د الوتکو تم ځای جوړولو پروژې چارې د یوه کال په موده کې د ۱۰۳ میلیونه افغانیو په لګښت پلې شوه.
یاده پروژه د مسافر وړونکو الوتکو د ښه مدیریت او مسافرو ته د لازیاتو اسانتیاوو برابرولو په موخه، د ټرانسپورټ او هوايي چلند وزارت له لوري د یوه خصوصي شرکت له خوا پلې شوې ده.
د پروژې مدیر میرزا اغا وايي: « دا د احمدشاه بابا په نړیوال هوايي ډګر کې د رمپ پروژه ده چې د ټرانسپورټ وزارت په ۱۰۳ میلیونه افغانیو بودیجې بشپړه شوه. دا پروژه ترمینل ته نږدې ده او له دې وروسته ۴ الوتکې کولی شي په کې ودرېږي.»
د ټرانسپورټ او هوايي چلند وزارت مسوولین د یادې پروژې پرانیستلو پرمهال وايي، هڅه کوي د هېواد ټولو هوایي ډګرونو کې په بېلابېلو برخو کې نورې پروژې هم پلې کړي. د دوی په خبره، دا مهال د کندهار هوایي ډګر کې د یوه نوي ټرمینل جوړولو په ګډون، یو شمیر نورې پروژې هم د تطبیق په حال کې دي.
د ټرانسپورټ او هوایي چلند وزارت د پروژو پلي کولو انجینرهدایت الله امید وايي: « د ټرانسپورټ او هوايي چلند وزارت هڅه کوي دا ډول نورې پروژې هم په هوايي ډګرونو کې پلې کړي. دا مهال په څو هوايي ډګرونو کې پروژې تر کار لاندې دي. د کندهار هوايي ډګر لپاره د یوه معیاري ټرمینل جوړول په پام کې نیول شوی چې اوس په تدارکاتي پړاو کې دی.»
په همدې حال کې، د کندهار نړیوال هوايي ډګر یوشمېر مسافر د دې ګام هرکلی کوي او د ورته نورو پروژو د پلي کېدو غوښتنه کوي.
د کندهار اوسېدونکی ډاکټرمنیراحمدصدیقي وايي: « زه ډېر وخت په سفر کې وم، خو نن چې راغلم د کندهار هوايي ډګر مې په بله بڼه ولید. کندهار هوايي ډګر ته ډېر بهرنۍ الوتنې هم راځي او که دوی دا ډول سهولتونه وویني، دا کولی شي زموږ د هېواد اقتصاد ته ګټه ورسوي.»
د کندهار اوسېدونکی احمدشاه وايي: « ډېر خوښ یم چې نوی تم ځای پرانستل شو. له دې وړاندې به خلک د بس موټر په وسیله تر الوتکې رسول کېدل او دا حالت د ناروغانو لپاره ډېر تکلیف و، خو اوس ډېر ښه شو چې الوتکه ټرمینل ته نږدې درېږي او خلک ور پورته کېږي.»
د یادونې وړده چې دامهال د ټرانسپورټ اوهوایي چلند وزارت له لوري په ټول هېواد کې له۸۰ څخه زیاتې بېلابېلې پروژې د تطبیق په حال کې دي.
