روانه اوونۍ د اسلامي امارت د ریاست الوزرا اقتصادي کمیسیون له لوري له کونړ سیند څخه د ننګرهار تر درونټې بند پورې د اوبو رسولو وړاندیز تایید شو او همهاله د هېواد په ختیځ او په تېره بیا ننګرهار کې له پراخ هرکلي سره مخ شو.
ننګرهار کې د کرنې د برخې متخصصان وايي، د دې پروژې په عملي کېدو سره به زرګونه جریبه ځمکه خړوبه شي او ختیځه حوزه کې به د کرنې او مالدارۍ برخه کې کرنیز سکټور نوره هم وده وکړي.
د کرنې برخې کارپوه سید نور الله وايي: « اوس د اقلیم بدلونونو له امله نړۍ مخ په تودېدو ده او له امله یې بارانونه او ورښتونه کم شوي. زموږ ډېری بزګران د اوبو له ستونزو سره مخ شوي. که چېرې ژر ترژره را وګرځول شوي او د ګمبېري پر دښته تېري شي، زیاته ځمکه به تر کښت لاندې راشي او موږ به ډېر محصولات ترلاسه کړو.»
یو بل کرنیز متخصص عطاالحق بشري وايي: « دا کانال یوه ملي او اقتصادي پروژه ده. دا پروژه د افغانستان د ځان بسیاینې او خوراکي توکو د تولید لپاره ډېره اغېزناکه بلل کېږي.»
په همدې حال کې د ننګرهار کرنې، اوبو لګولو او مالدارۍ ریاست مسوولین ډاډ ورکوي چې د دې پروژې له تطبیق سره به د ګمبیري دښتې په شمول ګڼې هغه ځمکې چې اوس مهال ترې استفاده نه کېږي، د استعمال وړ وګرځوي.
د ننګرهار کرنې او مالدارۍ ریاست ویاند اجمل سبحاني وايي: « کومې لویې پروژې چې په ننګرهار کې پلې کېږي، د کرنې ریاست او اداره ژمنه ده چې په دې برخه کې پراخې هڅې وکړي، ترڅو د خوړو خوندیتوب رامنځته کړي. دا پروژه هم د ناکامورا د پروژو په څېر ستره او مهمه پروژه ده.»
د ننګرهار یو شمېر کروندګر چې د وچکالۍ له امله د حاصلاتو کمښت ته اندېښمن دی، اوس هیله ورته پيدا شوې چې د دې پروژې په پلي کېدو سره به یې دا ستونزه حل شي.
بزګران ټینګار کوي چې حکومت باید ژر تر ژره د دې پروژې عملي چارې پیل کړي.
بزګرعجب ګل وايي: « ځمکه کې اړولې، خو اوس د الله رحمت او باران ته په تمه یم چې دا ځمکه خړوبه شي او غنم شنه شي. موږ په دې ډېر خوشاله یو چې د کونړ سیند اوبه د درونټې بند ته راوستل شي.»
یو بل بزګر عظم ګل وايي: « اوس بارانونه نه شته او یوازې د سیند اوبو ته ناست یو. د اسلامي امارت نه مو غوښتنه دا ده چې څومره ژر کېږي، دا نهر را تېر کړي، ترڅو زموږ ځمکې له اوبو برخمنې شي.»
د ننګرهار کرنې او مالدارۍ ریاست مسولینو د معلوماتو پر بنسټ، د دې پروژې په پلي کېدو سره به نږدې لس زره هکټاره ځمکه خړوبه شي او نه یوازې د کرنې په برخه کې به پرمختګ وشي بلکې ورسره به د درونټې برېښنا بند اوبه چې وروستیو کې یې اندازه ډېره کمه شوې هم بېرته زیاتې شي.
