د قرغېزستان یو لوړ پوړی پلاوی د دې هېواد د سوداګرۍ او اقتصاد وزیر بکیت صديکوف په مشرۍ کابل ته راغلی او له افغان چارواکو سره په لیدنو کې يې د دواړو هېوادونو ترمنځ د سوداګرۍ پر پیاوړتیا او پرمختګ خبرې کړې.
د افغان او قرغېزي چارواکو ترمنځ ناسته کې چې د صنعت او سوداګرۍ وزیر او د قرغېزستان د سوداګرۍ او اقتصاد وزیر ترمنځ ترسره شوه، د دواړو هېوادونو ترمنځ د سوداګرۍ پرزیاتوالي، د ټرانزیټ پر پراختیا او همدا راز د بهرنۍ او مشترکې پانګوونې پر جلب او جذب خبرې شوي.
د صنعت او سوداګرۍ وزارت ویاند اخندزاده عبدالسلام جواد وايي: « په دې لیدنه کې دواړو خواوو پر ځینو مهمو موضوعاتو لکه د سوداګرۍ د حجم ډېرولو، د مشخصو صادراتي توکو ټاکلو، د ټرانزیټ پراخولو او د ټرانزیټي هوکړه لیکونو لاسلیکولو، بهرنۍ پانګونې جذبولو، د تجارتي نندارتونونو، کنفرانسونو او ناستو جوړولو او دغه راز د ګډ کاري ګروپ ترمنځ د منظمو ناستو جوړولو په اړه بحث او د نظر تبادله وشوه.»
بله خوا، قرغېزستان په کابل کې د سوداګرۍ یو کور یا مرکز هم پرانیست چې حکومت یې د دواړو هېوادونو ترمنځ د سوداګرۍ پراختیا او پیاوړتیا لپاره ګټور بولي.
د صنعت او سوداګرۍ وزارت وايي، په کابل کې د قرغېزستان د سوداګریز مرکز پرانیستنه کولی شي د دواړو هېوادونو د سوداګرو ترمنځ اړیکې لاټینګې او د مشترکې پانګوونې لپاره زمینه برابره کړي.
اخندزاده عبدالسلام جواد په دې اړه وايي: « د دې سوداګریز کور پرانیستل د افغانستان او قرغېزستان ترمنځ د سوداګریزو او اقتصادي اړیکو د پیاوړتیا او بنسټیز کولو لپاره یو مهم ګام دی او د همکارۍ پراختیا، د سوداګریزو تبادلو زیاتولو، د دواړو هیوادونو د سوداګرو ترمنځ د اړیکو اسانتیا او د ګډو پانګونو هڅولو لپاره لاره هواروي.»
افغان پانګوال په کابل کې د قرغېزستان د سوداګریز کور پرانیسته د هېواد اقتصادي او سوداګریز پرمختګ په برخه کې مهم ګام ګڼي او زیاتوي، د دې کور په وسيله کولی شي په افغانستان کې بهرنۍ پانګوونې ته لا زیاته زمینه برابره کړي.
د افغانستان د کرنۍ او مالدارۍ خونې مرستیال حاجي میرویس حاجي زاده وايي: « د دې کور پرانستل به د افغانستان او قرغېزستان ترمنځ د اړیکو د پل حیثیت غوره کړي. موږ اوس هم قرغېزستان ته صادرات لرو، خو که هڅه وشي او فرصتونه برابر شي، موږ کولی شو د افغانستان مېوې او ترکارۍ دغه هېواد ته صادر کړو. قرغېزستان یو له هغو هېوادونو دی چې کچالو په کې زیات مصرف لري او موږ کولی شو له دې فرصت ګټه واخلو.»
همداراز، د افغانستان او قرغېزستان د سوداګرۍ وزیرانو د هغو تړونو پر تطبیق هم ټینګار کړی چې اقتصادي او سوداګریزو همکاریو په موخه موده وړاندې قرغېزستان ته د افغان پلاوي د سفر پرمهال له دې هېواد سره لاسلیک شوي وو.
