پکتیا کې یوه محلي سندرغاړي شرف الدین فضلي د هنري کارونو له ځنډ وروسته ګردېز ښار کې د چرګانو پلورنځی پرانیستی او ورسره پس له وخته په دولتي اداره کې هم دنده ترسره کوي.
فضلي وایي، چې بهر ته یې د تلو پر ځای غوره وګڼله چې هېواد کې پاتې شي. دا چې هنري کارونه نشي ترسره کولی د چرګانو دوکان یې پرانیستی او ۲۲ کسانو ته یې د کار زمینه برابره کړې ده.
نوموړی د پکتیا مرکز ګردېز ښار اوسېدونکی دی او له ۲۰ کلونو راهیسې يې په پښتو او دري ژبو سندرې ویلې.
شرف الدین فضلي وايي:« دا شخصي کاروبار چې د چرګانو دوکان دی شپږ میاشتې کېږي هڅه مې کوله خو دا یوه میاشت مخکې مې تیار کړ او ۲۲ نورو کسانو ته مې هم د کار زمینه برابره کړې.»
فضلي وایي، دا چې اوس هنري فعالیتونه نشي کولی، نو بهر ته د تللو پر ځای یې هېواد کې د پاتې کېدو پرېکړه کړې او له خپل شخصي کاروباره خوښ دی.
محلي سندغاړی فضلي زیاتوي:« هنري کارونه نشته، خپله تجارت کې مصروف یم. د کار شېوې ته مې تغییر ورکړ. زما نورو هنرمندانو ته هم پیغام دی، چې وطن دې نه پرېږدي او همدلته دې پاتې شي.»
سندغاړی فضلي پوهنې ریاست کې هم دنده لري او وایي، چې د امارت د مسوولینو چلند ورسره له درناوي ډک دی.
شرف الدین فضلي وايي:« زه پوهنې ریاست کې دنده لرم. د شکایتونو مدیر یم. زه پس له وخته دلته خپل دوکان کې کار کوم او له خپل روزګاره راضي یم.»
د جمهوریت له سقوط وروسته ګڼ سندرغاړي ګاونډیو او نورو بهرنیو هېوادونو ته وتلي، خو شرف الدین فضلي له نورو سندرغاړو غواړي، چې هېواد کې پاتې شي او د ده په څېر دې شخصی کاروبار ته مخه کړي.
