Skip to content
د اسلامي امارت بهرنیو چارو وزارت وايي، د رسمیت پیژندنې ټول معیارونه او شرطونه یې پوره کړي او نور باید خنډونه رامنځته نه شي.
یاد وزارت وايي، حکومت یې په ټول هېواد کې امنیت ټینګ کړی،ملي حاکمیت لري او د نړۍ هغه اندیښنه یې چې د ښځو زده کړو او د کار په برخه کې یې درلود،هم حل کړې او په دغه برخه کې یې عملي ګامونه اخیستي دي.
د یاد وزارت اقتصاد مشر شفیع اعظم وايي، بله هیڅ داسې پلمه نه ده پاتې،چې نړۍ دې دافغانستان د رسمیت پيژندنې پر وړاندې د خنډ په توګه مطرح کړي.
اعظم زیاته کړه:« د رسمیت پیژندنې لپاره چې یو حکومت څه ته اړتیا لري،هغه ټول پوره شوي دي،هغه د سراسري امنیت بحث دی،په ټوله خاوره باندې د حاکمیت بحث دی، د حکومت سکتور نه خلکو ته د خدماتو رسولو بحث ده د اورپايي ټولنې ستره اندیښنه د ښځو د تعلیم بحث و،چې عملي موږ په کې پرمختګونه لرو. د نجونو ښوونځي او پوهنتونونه پیل شوي دي،په لویه کې د مشروعیت لپاره ټول اساسات سره ته رسیدلي دي او داسې کوم مورد نه شته چې دغې مسلې ته دې بند واچوي.»
اخوا د سیاسي چارو یو شمېر شنونکي بیا وايي، په نړیوالو کنفرانسونو کې د اسلامي امارت داستازو ګډون،د نجونو ښونځویو او پوهنتونونو پرانېسته او په کابل د اروپايي ټولنې دفتر بیا فعالیت هغه څه دي،چې د افغاستان د نوي حکومت نړیوال مشروعیت یقیني کولی شي او دا د رسمیت اخیستو لپاره اړین ګامونه دي،چې اخیستل شوي.
د سیاسي چارو شنونکی عزیز معارج وايي:«د ښځو ګډون په برخه کې په نړیوال کنفرانسونو کې د افغانستان د استازو ګډون کول لکه ناروې،کابل کې د اروپايي ټولنې دفتر پرانېستل،امریکا د دولت انعطاف د ټولو مسایلو ته په کتو داسې ښکاري،چې داسلامي امارت د مشروعیت ستونزه حل کېږي او نږدې راتلونکي کې به د افغانستان سفارتونه هم په نړۍ کې پرانېستل شي.»
خو ځینې بیا دا مني،چې د رسمیت پیژندنې لپاره هلې ځلې زیاتې شوي،خو لاهم د نړۍ او د اسلامي امارت چارواکو ترمنځ تفاوتونه شته دي او پر همدې اساس به د افغانستان نوي نظام رسمیت پیژنده به نوره هم وځنډیږي.
دوی په دې باور دي، نړۍ او افغانستان له یو بل سره سیاسي تعاملاتو او اړیکو ته اړتیا لري،خو دغه تعامل د دواړه اړخونو په انعطاف سره رامنځ ته کیدای شي.
دپوهنتون استاد فیض محمد ځلاند وايي:« په دې وروستیو کې د افغان نوي دولت د رسمیت پیژندنې لپاره هلې ځلې زیاتې وشوې، خو داسې ښکاري چې په دې برخه کې دطالب چارواکو او نړۍ ترمنځ تفاوتونه ډېر زیات دي. د رسمت مسله به لرې خبره وي،ترهغې چې دغه تفاوتونه راکم شوي نه وي.»
له نړۍ سره د افغانستان اوسنیو سیاسي اړیکو ته په نړیوالو دیپلوماتیکو اصولو کې یو اړخیزې اړیکې ویل کیږي،چې تر اوسه هېڅ هېواد دې ته زړه نه دی ښه کړی،چې د افغانستان نوی سفیر په خپله خاوره کې ومني،خو بیا برعکس ځینې هېوادونه دې ته لېواله دي چې کابل کې سفارتونه او سیاسي استازولۍ پرانیزي.
