Skip to content
له افغانستان سره د بشري مرستو د لا زیاتیدو او په دې برخه کې د همغږۍ د لاپياوړتیا په موخه د ترکیې د سرې میاشتې مشر کریم کنیک کابل ته په درې ورځني سفر راغلی دی.
ټاکل شوې ده،په دغه سفر کې به کنيک د اسلامي امارت له رئیس الورزاء له مرستيالانو او بهرنیو چارو وزارت مسولینو سره ناستې ولري.
کابل هوايي ډګر کې کريم کنیک خبريالانو ته د دغه سفر موخه افغانستان سره بشري مرسته ياده کړه او په خبره يې ترکیه غواړي،د یوه دوست هیواد په توګه خپل رسالت اداء او خلکو سره مرسته وکړي.
کنيک زیاته کړه:« ترکیه د يوه مسلمان هیواد په توګه په دې فکر کوي،چې څنګه هغو کسانو ته د ژوند اسانتياوې برابرې کړي،چې په قاچاقي لارو ترکیې يا نورو هېوادونو ته ځي.»
کنیک وايي، له افغانانو سره مرستې به دوامدره وي او دوی هڅه کوي،دا غږ تر نړیوالو ورسوي.
کنيک زیاتوي:« زموږ دنده او مسوولیت هم دا دی،چې په نړیوال ډګر کې د افغانانو غږ پورته کړو. د افغانستان اوسني خراب اقتصادي وضعیت په اړه اندېښې شريکې کړو، د همدې له پاره ترکیه غواړي،خپلې مرستې دوامداره وساتي.»
د افغانې سرې مياشتې مسولینو بيا وايي، له کریم کنیک سره په ناستو کې به پر هغو موضوعاتو بحثونه وکړي،چې د دواړو هېوادونو له پاره مهم وي.
د افغانې سرې مياشتې د مسولینو په خبره، په دغه سفر کې به د ترکيې سرې مياشتې له لورې اړمنو او بې وزله خلکو لپاره د مرستو کولو خبره هم وشي،خو مالومه نه ده،چې ياده مرسته به څومره وي.
