Skip to content
په کابل کې د چهار شنبې پر ورځ د « ۱۴۰۰ کال د سلواغې پر ۱۳ مه» لسګونه افغان محصلینو د هند سفارت مخې ته د وېزې نه ورکړې په غبرګون کې لاریون کړی دی.
دوی وایي، او په کراتو یې د هند له حکومت غوښتي،چې دوی ته ویزې ورکړي، په خبره یې تر اوسه پورې یې مثبت ځواب نه دی ترلاسه کړی.
یو تن معترض محصل حامد ځاځی وايي:« د هندوستان هېواد موږ هېله کوو،چې زموږ ستونزو ته رسېدنه وکړي. تعلیم زموږ حق دی، زموږ محصلین تیار بایومتریک شوي دي او قانوني ویزې دې ورکړي.»
اعتراض کوونکي محصلین وایي،له هېڅ سیاسي ګروپ پورې تړاو نه لري، یوازې محصلین دي او د خپلو زده کړو په اړه د عدالت غوښتنه کوي.
دوی وایي،د هند حکومت دې زده کړې د سیاست قرباني نه کوي او نه دې دوی له زده کړو محروم کوي.
دوی وايي، ویزې غواړي،چې لاړ شي او هند کې خپل درسونو ته دوام ورکړي.
یو تن معترض محصل محمد شفیق نیازی وايي:« زموږ غوښتنه روښانه ده. موږ ویزې غواړو او موږ له هېڅ کوم سیاسي ګروپ پورې تړاو نه لرو. موږ نه غواړو،چې زموږ تعلیم له سیاست سره یو ځای او قرباني شي، نو موږ ویزې غواړو،چې خپلو زده کړو ته دوام ورکړو،ځکه موږ د خپلو درسونو او خپلې راتلونکې په تړاو اندېښنه لرو.»
دوی د هند سفارت مخې ته اعتراض کړی او غواړي،چې د هند حکومت یې غږ واوري او ستونزې یې ورته حل کړي.
محصلین اندېښنه لري،چې هلته یې درسونه په حضوري توګه پیل شوي او که دوی ورنه شي،درسونه ترې تیریږي.
یو تن معترض محصل طاهر وايي:« موږ له هند غواړو،چې ویزې راکړي،ترڅو زده کړو ته دوام ورکړو،ځکه ډېری محصلین دلته بند پاتې دي او درسونه یې حضوري پیل شوي دي او د ډېریو وروستي سمسترونه دي.»
د مالوماتو له مخې،د کورونا ویروس او افغانستان کې د سیاسي تحولاتو له امله شااوخوا ۲۵۰۰ هغه افغان محصلین چې هند کې یې زده کړې کولې اوس بند پاتې دي.
