د عصري ټکنالوجۍ د چټک پرمختک په روان بهیر کې لاهم د افغانستان ځینو سیمو اوسېدونکي مخابراتي خدماتو ته لاسرسی نه لري.
د سرپل بلخاب ولسوالۍ اوسېدونکي وايي، د ټیلفوني اړیکې نیولو لپاره اړ دي چې ساعتونه لرې ځای ته مزل وکړي.
ځايي اوسېدونکي شکایت کوي چې دغې چارې نه یوازې ستړي کړي بلکې ورځني کارونه يې هم له خنډ سره مخ کړي.
د بلخاب اوسېدونکی محمد صفایي وايي: « د بلخاب ولسوالۍ ۹۰ سلنه خلک مخابراتي ستونزې لري. دلته په ټوله ولسوالۍ کې ۲ د سلام، ۳ د روشن او یو هم د افغان بیسیم مخابراتي شبکو انتنونه دي چې هغه هم د ولسوالۍ تر مرکز پورې محدود دي. پاتې ټوله ولسوالي او کلي مخابراتي خدمتونو ته لاسرسی نه لري.»
د بلخاب اوسېدونکی حسین ابراهمي وايي: « لرې پراته کلي مخابراتي شبکو او انټرنېټ ته هېڅ ډول لاسرسی نه لري. د ستونزو پرمهال د اړیکو ټینګولو امکانات نه شته.»
د بلخاب خلک په دولتي ادارو کې د خپلو کارونو پر وخت او ژر ترسراوي کې هم د مسوولینو جدي پاملرنه غواړي.
د بلخاب یوتن اوسېدونکی محبوب وايي: « بلخاب ډېرې ستونزې لري، خو تر ټولو بېړنۍ هغه یې مخابراتي شبکو ته د لاسرسي نه لرلو ستونزه ده. موږ دلته د بلخاب په مرکز کې ستونزه لرو، لرې پراته کلي خو اصلا ً لاسرسی نه لري. خلک له دې ستونزې ډېر ځورېږي او هیله لرو چې ژر تر ژره رفع شي.»
که څه هم د مخابراتو وزارت مسوولین ادعا کوي چې د هېواد۹۰ سلنه وګړي مخابراتي خدماتو ته لاسرسی لري، خو د بلخاب په څېر لرې پرتې سیمې لاهم له مخابراتي خدمتونو بې برخې دي.
د مخابراتي خدمتونو د تنظیم(اترا) ادارې ویاند وایي، وروستیو څلورو کالو کې مخابراتي خدمات تر زیاتو محرومو سیمو رسول شوي او هڅه کېږي چې پاتې نورو ته هم ورسول شي.
د اترا ادارې ویاند جلاالدین شمس وايي: « اترا ادارې د خپلې انکشافي بودیجې له لارې په سرپل ولایت کې ۲۳ مخابراتي سایټونه فعال کړي او د سږ کال لپاره هم د ۷ نورو جوړول په پلان کې نیول شوي وو چې د جوړېدو چارې یې روانې دي. همدارنګه د نورو مخابراتي شبکو له خوا هم په سرپل کې ۸ نوي انتنونه جوړېږي چې ورسره به په دې ولایت کې مخابراتي ستونزې راکمې شي.»
دا یوازې د بلخاب ولسوالۍ نه ده چې مخابراتو خدماتو ته په کې لاس رسی محدود دی بلکې د خلکو په خبره لا هم د هېواد ډېر شمېر لرې پرتو سیمو کې مخابراتي خدمتونه نه شته یا کمزوري او محدود دي.
