د ناورې ناستې په دویمه ورځ د اسلاميامارت پلاوي او د امریکا او اروپايي ټولنې او د یو شمیر نورو لویدیځو هوادونو له استازو سره ناسته کې په ټولشموله حکومت بحث شوی دی.
د بهرنیو چارو چارسبمالی امیر خان متقي، چې د اسلامي امارت پلاوي مشري کوي وايي،حکومت یې ټول شموله دی او په سرپرسته کابینه کې د ټولو قومونو او سمتونو استازي موجود دي او دندې لري . متقي وايي،که نړیوال د محمد اشرف غني تیر حکومت ټول شموله ګڼي،نو د هغه حکومت ټول کارکوونکي په خپل ځای او نه دي بدل شوي.
متقي زیاته کړه:« که چیرې د ټول شموله حکومت مانا همدا وي،چې ټول قومونه دې په حکومت کې وي،نو دا خو شته دی. که مانا یې دا وي،چې ټول ولایتونه او ټول سمتونه دې په حکومت کې وي،دا خو هم شته دی. که چیرې د اشرف غني مخکینی حکومت همه شمول و، د هغه حکومت هیڅ څوک موږ له دندنو نه دي لري کړي،چې شاوخوا ۵۰۰ زرره خلک یې موږ سره کار کوي،نو کله چې پخوانی حکومت هم په خپل ځای دی، د هېواد له ټولو برخونه خلک موږ سره په حکومت کې شامل دي دا یو ښه پرمختګ دی،خو موږ یې کافي نه ګڼو او هڅه کوو،چې نور هم حکومت ټول شموله شي او ښه شي چې ټول خلک قانع شي او په فعلي نظام کې ځان وګوري.»
د دغې ناستې یوه ګډونواله محبوبه سراج،چې له کابله اسلو ته ورغلې،له خبرو مالومیږي،چې په ناسته کې د ځينو هغو افغان لوریو له خوا چې اوس له افغانستانه تښتیدلي دي، د ټول شموله حکمت د بحث پرسر داسې مسایل مطرح شوي،چې ان د افغانستان ویش هم په کې یاد شوی دی.
میرمن سراج وايي،د یوې افغانې په توګه یې تاریخ د افغانستان تاریخ پورې تړلی دی او چاته به اجازه ورنه کړي،چې افغانستان په څو ټوټو وویشي .
هغه زیاته کړه:« زه خو نه شم کولای،چې اجازه ورکړم،ترڅو افغانستان په پنځه برخو وویشل شي او هره برخه یې یو مملکت ونیسي او بیا به موږ خوشحاله یو،چې هېواد لرو،نه دا اجازه نه شته دی. زه د یوې میرمنې د یوې افغانې په توګه او د داسې یو چا په توګه چې زما تاریخ د دې هېواد تاریخ پورې تړلی دی نه شم کولی،دا اجازه ورکړم .»
اسلامي امارت وايي، د امریکا، بریتانیا، فرانیسې ایټالیا او قطر هېوادونو له استازو سره یې په بشري مرستو، روغتیا، اقتصادي او د ښځو او بشري حقونو پر موضوعاتو خبري کړي او په باور یې دغه خبرې هیله بښوونکې وې او تر ډېره یې قناعت هم ورکړی دی.
په بهرنیو چارو وزارت کې د اقتصاد رییس شفیع اعظم وايي:« په دې کې د امریکا دمتحده ایالتو د بریتانیا، فرانسې، ایټالیا او د قطر هېواد استازي دي او ښه مجالس مو ورسره درلودل. د بشري مرستو چټکتیا، اقتصادي مرستې،امنیتي مسایل بشري حقونه او د ښځو حقونه هغه مهم موضوعاتو ول،چې دواړو لوریو پر دې باندې بحث او خبري وکړې. همدا راز اسلامي امارت د ناستې له ګډون والو سره خپلې لاسته راوړونې او موجوده ستونزې شریکې کړې.»
اخوا د سیاسي چارو یو شمېر کارپوهان بیا وايي، اسلامي امارت باید د نړیوال رسمیت ترلاسه کولو لپاره ټول هغه مسولیتونه په ښه توګه او پروخت عملي کړي،چې د ناورې په ناسته کې یې منلي دي او له دې سره به افغانستان له نړیوالې انزوا ووځي او د بشري ناورین مخه به هم ونیول شي.
د سیاسي چارو کارپوه حکمت الله حکمت وايي:« په دې ناسته کې پریکړې نه دي شوي،ولې دندې اخیستل شوي دي او مسولیتونه ویشل شوي دي. زموږ هېله داده،چې د افغانستان اسلامي امارت چې کوم مکلفیتونه او دندې ترلاسه کړي دي، د نړیوال مشروعیت او د نړیوالې همکارۍ د راجلبولو لپاره هغه په ښه تو ګه او په کم وخت کې اجرا کړي .»
د تېرو څو ورځو راهیسې د ناروې هیواد پلازمینې اسلو کې د امیرخان متقي پر مشرۍ د اسلامي امارت پلاوی د امریکا او اروپايي ټولنې له استازو سربیره له ګڼو نورو هېوادو استازو سره په خبرو بوخت دي.
