د پاکستاني درملو د وارداتو له بندېدو سره هممهاله، د درملو تولید په برخه کې د افغانستان پر ځان بسیاینې نوې هڅه!
په مزارشریف ښار کې د درملو تولید په نوې فعاله شوې کارخونه کې لسګونه کسان په درمل جوړولو بوخت شول.
د بېلابېلو ناروغیو د درملنې لپاره ګولۍ، شربت او پېچکارۍ د تازه فعالې شوې کارخونې هغه محصولات دي چې دا مهال د هېواد ګڼو ولایتونو کې وړاندې کېږي.
د کارخونې لابراتواري برخو مسوولین د جوړېدونکو درملو کیفیت د بهرنیو هغو تر کیفیت څو برابره ښه بولي. د دوی په خبره، ټول تولیدېدونکي درمل تر لابراتواري ارزونې وروسته بازار ته وړاندې کېږي.
د درملو تولیدونکې کارخونې فارمیسسټه رنګینه سیرت وايي: « دلته تولید خپله د افغانانو ترنظر لاندې دی او موږ هر ډول درمل څو ځله ټېسټ کوو او ترڅو پړاوونو یې تېروو او بیا یې تولیدوو. موږ هېڅکله د بهرنیو درملو تضمین نه شو کولی، خو زموږ درمل له هره اړخه تضمین شوي دي.»
د درمل جوړولو کارخونې تولید آمر شفیق رحمان سلطاني وايي: «موږ خپل درمل په بازار کې له بهترینو بهرنیو درملو سره پرتله کړي او څرګندوي چې زموږ درمل له هغو هم ۲ یا ۳ سلنه پورته دي. زموږ درمل لوړ کیفیت او ټیټه بیه لري.»
د کارخونې مسوولین وایي، د ۵۰ قلمه بېلابېلو درملو تولید ظرفیت لري، خو لا هم د درملو لپاره خام مواد له نورو هېوادونو را واردوي. دوی غوښتنه کوي چې د پاکستان په ځای له نورو هېوادونو د وارداتو لپاره اسانتیاوې رامنځته کړي.
د درملو تولیدي کارخونې مسوول زمرک شینواری وايي: « د درملو په ترکیب کې ځینې مواد ډېر مهم دي او باید له بهر څخه وارد شي. په دې وروستیو کې د اسلامي امارت له خوا په یو شمېر کیمیاوي موادو بندیز لګېدلی او وارداتو ته یې اجازه نه ورکوي. زموږ غوښتنه دا ده چې دغو موادو ته اجازه ورکړي، ترڅو زموږ د درملو سکټور نوره وده هم وکړي.»
بلخ کې د درملو اتحادیې د مسوولینو په وینا، دا مهال بلخ کې د درمل جوړولو دوې فابریکې فعالیت کوي چې په وینا يې، د خامو موادو د برابرېدو په برخه کې د پاکستان پرځای له نورو هېوادونو سره خبرې روانې دي او په نږدې راتلونکې کې به د پانګوالو اړتیاوې پوره شي.
بلخ کې د درملو اتحادیې مسوول محمد صادق محمدي وايي: « ډېر ژر به د خامو موادو لپاره په ګمرکونو کې اسانتیاوې برابرې شي، ترڅو له تولیدي کارخانو سره همکاري وشي او شته نیمګړتیاوې پوره شي. موږ ډاډ ورکوو چې د درملو په برخه کې کمښت ته اجازه نه ورکوو.»
دا په داسې حال کې ده چې له پاکستان سره تر وروستیو سیاسي کشالو وروسته له دې هېواد سره پر هر ډول سوداګریزو اړیکو د بندیزونو ترڅنګ، د درملو پر وارداتو هم بندیز ولګېده.
افغانستان د پاکستان ترڅنګ له چین، ترکیې، هند، بنګله دېش او یو شمېر نورو اسیایي هېوادونو درمل واردوي.
