د اطلاعاتو او فرهنګ وزارت د ځوانانو معینیت اړوند د څو موخیزه ښوونیز مرکز څخه ۵۰ تنو له حرفوي او مسلکي زده کړو د فرغت سندونه ترلاسه کړل.
مسوولین وایي، فارغو شویو کسانو د ګرځند ټیلفونونو، کمپیوټر، یخچال، اې سي او نورو تخنیکي وسایلو د ترمیمولو په برخه کې درې میاشتنۍ عملي او مسلکي زده کړې ترلاسه کړې چې اوس یې په مرسته کولی شي کوچني کاروبارونه او اقتصادي ملاتړ لپاره فرصتونه برابر کړي.
د ځوانانو معینیت اړوند ښوونیز مرکز رییس نعمتالله عنایت وايي: « په دې پروګرام کې چې نن موږ او تاسو حضور لرو، پنځوس تنو د درېیو میاشتو په موده کې خپلې زده کړې ترسره کړې. په دې درېیو میاشتو کې یادو ۵۰ تنو زده کوونکو ته د حرفوي زده کړو ترڅنګ د لارې کرایه، قرطاسیه او خام مواد هم ورکړل شول. همدارنګه دغو ټولو کسانو ته د کار وسایل هم اخیستل شوي دي.»
د یاد مرکز ښوونکي فارغو شویو کسانو ته د مسلکي او حرفوي زده کړو درې میاشتنۍ عملي دورې بشپړلو د مبارکۍ ترڅنګ وایي، ځوانان باید د ترلاسه کړیو زده کړو په مرسته د ورځنۍ ټکنالوجۍ مطابق خپلې چارې پر مخ یوسي.
د ځوانانو معینیت اړوند ښوونیز مرکز ښوونکی عبدالواسع جامي وايي: « دغه ځوانان نه باید په ترلاسه کړیو زده کړو بسنه وکړي، باید د ټکنالوجۍ له پرمختګ سره دوی هم پرمختګ وکړي.»
بله خوا، د اطلاعاتو او فرهنګ وزارت چارواکي د ځوانانو د ملاتړ او عملي فرصتونو رامنځته کولو په برخه کې د بشپړ ملاتړ ډاډ ورکوي او په خبره یې، په خپل ټول توان چمتو دي چې ځوانانو ته د مناسبو کاري فرصتونو زمینه برابره کړي.
د اطلاعاتو او فرهنګ وزارت د ځوانانو معینیت د برنامو د تنظیم رییس حضرتالله شریفي وايي: « د اطلاعاتو او فرهنګ وزارت د ځوانانو د اقتصادي پیاوړتیا لپاره مختلفې برنامې لري. موږ دا ډول مرکزونه په شپږو زونونو کې لرو او هره میاشت سلګونه ځوانان ترې فارغېږي. دا نو اوس د ځوانانو مسوولیت دی چې ټولنې ته ښه خدمتونه وړاندې کړي.»
له مسلکي زده کړو فارغ شوي کسان بیا د حرفوي زده کړو د دې لړۍ ستاینې ترڅنګ له حکومت او اړوند بسپنه ورکوونکو ادارو څخه د ورته برنامو د زیاتوالي غوښتنه کوي.
له مسلکي زده کړو فارغ شوی نظیفالله وايي: « زه ژمنه کوم هغه څه چې مې دلته زده کړي، د خلکو په خدمت کې ترې ګټه واخلم.»
له مسلکي زده کړو فارغ شوی شعیب احمد وايي: « له دولت غوښتنه کوم چې دا ډول پروګرامونه لا زیات کړي، ترڅو خلک له وزګارتیا وژغورل شي او هم د خلکو خدمت وشي.»
د یادونې وړ ده چې د ځوانانو څو هدفي ښوونیز مرکز، په ۲۰۲۲ زېږدیز کال د اطلاعاتو او فرهنګ وزارت د ځوانانو معینیت او همکارو بسپنه ورکوونکو ادارو له لوري د هېواد په ۶ زونونو کې فعالیت پیل کړ چې تر دې دمه زرګونه کسانو له دې مرکزونو د انګلیسي ژبې او کمپیوټر سربېره، په بېلابېلو برخو کې د حرفوي او مسلکي زده کړو فراغت سندونه ترلاسه کړي دي.
