د سیاسي چارو یو شمېر کارپوهان وايي، که اسلامي امارت ته وړاندې شوي شرایط و نه منل شي، نو نړیوال اوس هم د اقتصادي او سیاسي بندیزونو سربیره،ګڼ فشارونه پر میز لري او کولای شي پر اسلامي امارت یې ولګوي.
د سیاسي چارو کارپوه سلیم کاکړ وايي:« اوس هم درې فشارونه او بندیزونه شته دی، چې د امریکا پر میز پراته دي او پر اسلامي امارت یې لګولای شي. د هغو پیسو بندیزونه چې امریکا کنګل کړې دي، د سیاسي مشروعیت بندیز او هغه یو شمیر نظاميان،چې د طالبانو په لیکو کي دي او اسلامي امارت ته یو ګواښ کیدای شي.»
له دې هرڅه سربېره رواني، ډیپلوماټیک او نظامي فشارونه هم د دې لامل کیدای شي،چې اسلامي امارت دې ته اړ باسي،چې د نړیوالو شرایطو ته غاړه کیږي.
اخوا ځنې نور بیا وايي، د دغو بندیزونو او فشارونو راکمولو یوازینۍ وسیله د تفاهم او مباحثې ژبه کیدای شي.
دوی وايي، له نړیوالو سره د اسلامي امارت شته کړکیچونه باید حل شي،ځکه منفي اغیزې به یې ډېرې اوږدمهالې وي.
د سیاسي چارو کارپوه شفیق همدرد وايي:« دغه فشارونه باید راکم شي او مسایلو ته باید د خبرو او بحث له لارې حل لار ولټول شي،ځکه د طالبانو په لومړۍ دوره کې هم دغه کار وشو او موږ یې منفي پایلې تر اوسه پورې وینو. نو ښه خبره دا ده،چې رامنځ ته شوې ستونزې د خبرو او بحث له لارې حل شي.»
بل لور ته یو شمیر پخوانیو لوړپوړو بریټانیوي چارواکو ګارډین ورځپاڼې ته په یوه استول شوي لیک کې وړاندیز کړی دی،چې پر افغانستان ځنې لګول شوي بندیزونه دې پرخپل حال وي،خو د عامه خدمتونو برخې باید له بندیزونو او فشارونو خوندي وي.
