Skip to content
د ناروې پلازمینه اوسلو د افغانستان بهرنیو چارو وزارت چارسمبالي امیر خان متقي پۍ مشري پلاوی ناروې کې د اروپایي هېوادونو له استازو سره پر مذاکراتو بوخت دی.
په دې خبرو کې امریکایان او د عربي هېوادونو استازي هم شامل دي.
تر اوسه پورې د خبرو اجنډا روښانه نه ده،خو باور کېږي،چې د افغا پلاوي او بهرنیو ترمنځ به روان مذاکرات افغانستان کې د یو ټول ګډونه حکومت پرسر وي.
د خبرو بل محور په ناروې کې افغانان دي،چې لا مالومه نه ده، ایا د اسلامي امارت مخالف جهت او که عام افغانان چې له کلونو راهیسي ناروې کې کډوال دي.
د خلاصونو لارې شورا مشر سیداکبر اغا وايي:« فکر کوم،هغه افغانان،چې د باندې دي هغه دوه ډوله دي، یو مخالف لوری دی او بل هغه افغانان چې په مخالفت کې نه دي ښکیل د هېواد د باندې دي. دوی ښه مشوره ورکولای شي،خو ډېر مشهور خلک به نه وي.»
ناورې د اسلامي امارت او پخوانیو سیاسي مشرانو ترمنخ خبرو ته له پخوا لېواله وه،چې د افغانستان د کړکېچ حل په برخه کې رول ولوبوي.
دا لېوالتیا هغه وخت زیاته وه،کله چې د اسلامي امارت او محمد اشرف غني حکومت ترمنځ دوحه کې بین الافغاني خبرې روانې وې.
کارپوهان وایي، سره له دې چې اسلامي امارت بدلون نه کوي،خو دا به یوه معجزه اوسي چې دوی ناروې کې د نړیوالو لید لوری د ځان پر وړاندې رامات کړي.
کارپوه طارق فرهادي وايي:« هغه څه،چې موږ پرې پوهیږو،طالبان بدلون نه کوي،بلکې هغوی چې ناورې ته تللي دي، غواړي نور بدل کړي. هېله لرو،چې یوه معجزه شي،هغه افغانان چې منځ کې پاتې دي یو څه وشي.»
د ناروې په اړه باور دا ده،چې د بحرانو د حل په برخه کې ښه تجربه لري.
سره له دې،چې جګړه پای ته رسېدلې،خو بشري ناورین د اسلامي امارت حکومت پر وړاندې جدي ننګونه ده.
طالبان هڅه کوي، نړیوالو ته قناعت ورکړي.
ټول ګډونه حکومت،بشري حقونه، د ښځو حقوق او دې ته ورته یو شمېر غوښتنې د نړیوالو دي،چې د اسلامي امارت حکومت رسمیت پېژندنې لپاره شرطونه دي.
کارپوهان وایي،د دې غوښتنو نه پوره کېدو په صورت کې د اوسلو مذاکرات مثبته پایله نه شي لرلی.
شنونکی ویس ناصري وايي:« دا خبرې هغه وخت بریالۍ دي،چې طالبان خپل لیدلوری بدل کړي،داسې حکومت جوړ کړي چې د قواوو تفکیک په کې اوسي. ټول لوري په کې وي، د ښځو حقوق، سیاسي لورو ګدون، له دې پرته مذاکرات اغیز نه لري.»
اوس به ولیدل شي،چې اروپا ته د اسلامي امارت پلاوي لومړنی سفر به څه پایله ولري.
خو هغه څه،چې اوس روښانه دي،هغه دادي،چې د اسلامي امارت حکومت به د اوس لپاره په رسمیت نه منل کېږي ولې دې ډول مذاکراتو هېله بیا داده،چې دې کار سره په راتلونکې کې مرسته کولای شي.
