وروسته له هغې چې پاکستان د افغان سوداګرو پرمخ سوداګریزې لارې وتړلې، اوس مهال په کور دننه د مېوو نرخونه راټیټ شوي او په هېواد کې په اسانۍ د لاس رسي وړ دي.
د جلال اباد ښار منډوي کې د هېواد تازه مېوې ارزانه او ډېرې دي، خو په ورته مهال ځینې پاکستانۍ میوې هم ترلاسه کېږي چې د خلکو په خبره په قچاقي ډول را وړل شوې دي.
د تازه مېوو کاروباري هجرت الله وايي: « دا امروت او کینو له هغه ځایه د کډوالو په موټرو کې اچوي او تر تورخم یې را اړوي؛ په تورخم کې په یوه مارکېټ کې ځای پرځای کېږي او بیا په هغو موټرو کې تر ښارونو راوړل کېږي چې له تورخم بېرته راګرځي. دا په داسې حال کې ده چې زموږ مېوې ټولې خوسا شوې»
د تازه مېوو کاروباري عارف وايي: « د پاکستان امروت او کېلې راځي او په ښه بیه خرڅېږي، باید زموږ سوداګرو ته هم لاره خلاصه شي یا یې بلکل مخه ونیول شي. نه پوهېږو په کومه لاره راځي او ولې راځي.»
ننګرهار کې د تازه مېوه جاتو او سبزیجاتو اتحادیې مسوولین او سوداګر وايي، د پاکستان مالټې او امروت د کډوالو په موټرو کې را اړول کېږي او مسوولین یې باید د قاچاق مخه ونیسي.
ننګرهار کې د تازه مېوو او سبزیجاتو اتحادیې مرستیال ستانه ګل شېرزاد وايي: « د تورخم په مسوولینو غږ کوم چې کله زموږ مېوه او سبزي هغې خواته نه پرېښودل کېږي، باید د دوی د مېوې او سبزۍ مخه هم ونیول شي. دا زموږ د تجارت او ملت دواړو په تاوان دی.»
د تازه مېوو سوداګر نورمحمد وايي: « دا مېوې په کانټینرو کې له کډو سره را اړوي. اسلامي امارت باید د دې مخه ونیسي. ځینې وطن پلورونکي دا کار کوي، حال دا چې زموږ مېوه هلته نه شي تللی.»
د مېوو پلورونکي او سوداګر په قاچاقي ډول له پاکستانه د تازه مېوو را اړولو ادعا داسې مهال کوي چې تازه د سرحدي پولیسو لوی ریاست ډاډ ورکړی چې پر ډیورنډ فرضي کرښه پرتو لارو کې پلټنې جدي شوې او هېچاته اجازه نه ورکول کېږي چې له پاکستانه مېوې او یا نور توکي په قاچاقي ډول را واړوي.
د سرحدي پولیسو ویاند عابد الله فاروقي وايي: « تېره شپه او ورځ د اسلامي امارت سرحدي ځواکونو د کډوالو په موټرو کې د مېوو او درملو د را اړولو هڅې شنډې کړې دي. د سرحدي پولیسو ټول منسوبین د خپل مسوولیت په ساحو کې هر ډول چمتوالی لري او هېچا ته اجازه نه ورکوي چې د اسلامي امارت قوانین او پرېکړې نقض کړي.»
په ورته مهال، د جلال اباد اوسیدونکي بیاغوښتنه کوي چې خلک باید د پاکستانيو مېوو په ځای افغاني مېوې او سبزیجات وپېري، ترڅو په خبره يې، د افغان سوداګرو او بڼوالو د زیان مخنیوی وشي.
د جلال اباد ښار اوسېدونکی حبیب الله وايي: « اوس زموږ کورنۍ مېوې ډېرې ارزانه دي، هېوادوال یې باید واخلي، ترڅو یې زموږ بڼوالو او سوداګرو ته ګټه ورسېږي.»
د جلال اباد اوسېدونکی عبد الله وايي: « موږ باید د خپل هېواد مېوې وکاروو، ترڅو یې ګټه زموږ خپل بزګر ته ورسېږي. زه له خلکو غوښتنه کوم چې کورنۍ مېوې واخلي.»
دا لومړی ځل نه دی چې خلک د پاکستانيو مېوو په ځای د کورنیو مېوو د کارولو غوښتنه کوي بلکې له دې مخکې هم په ځلونو افغان سوداګرو، بڼوالو او مسوولینو له خلکو غوښتي چې په خپلو مراسمو کې له افغاني مېوو استفاده وکړي.
