شین ډنډ د هرات تر ټولو لویه ولسوالي ده چې د نفوس د زیاتوالي او پراخې جغرافیې له امله، اوس د اوبو کمښت له جدي ستونزې سره مخ ده.
دا ولسوالي چې د مسولینو په خبره اوس مهال نږدې یو میلیون وګړي لري، خو یوازې شاوخوا ۱۸۰۰ کورنۍ یې د مرکزي شین ډنډ په برخه کې د څښاک پاکو اوبو ته لاسرسی لري او پاتې نور د اوبو برخه کې له سختو ستونزو سره مخ دي.
د شین ډنډ ولسوالۍ د اوبو رسونې عمومي مدیر بسم الله عطایي وايي: « د اوبو ستونزه ډېره زیاته ده. د شین ډنډ د اوبو رسونې ادارې ۱۸۰۰ کورنیو ته اوبه رسولې دي، خو د شین ډنډ په سطحه زاول، زېر کوه او پشت کوه سیمې اصلا ً اوبه نه لري. له دغو سیمو څخه ګڼو کورنیو کډه کړې او بازار ته راغلي.»
په ورته مهال، د دې ولسوالۍ اوسېدونکي هم هلته د څښاک پاکو اوبو ته د لاسرسي برخه کې له ستونزو شکایت کوي او وایي، د شین ډنډ پنځه ګونو ولسوالیو لرې پرتو سیمو څخه ډېری کورنۍ د اوبو کمښت له امله له خپلو اصلي سیمو کډه شوې دي.
د شین ډنډ ولسوالۍ اوسېدونکی فرهاد وايي: « موږ اوبه نه لرو، تر ۱۵۰ مترو ژوره برمه مې ووهله، خو بیا هم اوبه پيدا نه شوې. اوس یو نیم ساعت لرې په اوبو پسې ځم او ټانکر کې یې راوړم.»
د شین ډنډ اوسېدونکی غلام سخي وايي: « هرڅومره چې د اوبو رسونې پروژې ډېرې شي، خلک به ورسره هوسا شي. خلک د څښاک اوبه نه لري او تر ځمکې لاندې اوبه هم ۱۵۰ مترۍ ته ټیټې شوې دي.»
د زېرکوه ولسوالۍ اوسېدونکی علي احمد وايي: « موږ په زېرکوه کې د اوبو له سخت مشکل سره مخ یو. اوبه کمې دي او هغه هم تروې دي، خوږې اوبه ډېرې لږې پیدا کېږي.»
بله خوا، تازه د شین ډنډ مرکزي ولسوالۍ کې د سره صلیب نړیوالې ادارې له خوا څښاک پاکو اوبو ته د خلکو لاسرسي برخه کې د ستونزو حل په موخه د شپږو میاشتو په موده کې د اوبو رسونې شبکه جوړه کړې چې تر ۱۵ کلونو به د څه باندي ۱۴ زره کسانو اوبو اړتیا پوره کړي.
د سره صلیب استازی عزیز احمد اسماعیلي وايي: « د اوبو رسونې دا شبکه چې نن مو دلته پرانسته، له نېکه مرغه د راتلونکو ۱۵ تر ۲۰ کالو پورې د شین ډنډ د مرکز لپاره بسنه کوي.»
شین ډنډ د هرات سوېل خوا ته ۱۳۰ کیلومټرۍ کې پرته ولسوالي ده چې ۸۵۰۰ کیلومټره مربع مساحت لري او په ۱۳۹۶ لمریز کال په پنځو ولسوالیو شین ډنډ، زېر کوه، کوه زور، زاول او پشت کوه ووېشل شوه.
د مسوولینو له معلوماتو سره سم، اوسمهال په دې ولسوالي کې د اوبو کمښت ستونزي د نسبي حل لپاره د اوبو رسونې ۵۰ کیلومټره شبکې ته اړتیا ده.
