د افغان پوسټ شرکت له خوا ننګرهار کې تر کوره خلکو ته د پاسپورټونو، تعلیمي او تحصیلي سندونو او نورو اسنادو رسولو پوسټي خدمات پيل شول. مسوولین وايي، تر کوره د اسنادو او پاسپورټونو رسول د غوښتونکو په خوښې پورې اړه لري او د دوی په غوښتنه به تر کوره وروړل کېږي؛ ځکه چې شرکت د دې خدمت په بدل کې سل افغانۍ اخلي.
ننګرهار کې د افغان پوسټ شرکت آمر ډاکټر نصیر احمد پاچا وايي: « نن د ننګرهار ولایت یو ځوان راځي او خپل اسناد د کمو پیسو په بدل کې تسليموي، دا اسناد بیا تر اړوند وزارت پورې ځي او د وزیر په لاس تر لاسلیک کېدو وروسته بېرته د دې کس کور ته وروړل کېږي.»
مسوولینو په دې تړاو جوړو شویو مراسمو کې وویل، تر پخوا يې اوس خدمات پراخ شوي او په خبره يې، اوس مهال۳۶۰ مرکزونو په لرلو سره په ۲۰ برخو پستي خدمات وړاندې کوي.
د افغان پوسټ شرکت عمومي رییس رحمت الله مکي وايي: « په ټول افغانستان کې د افغان پوسټ ۳۶۰ مرکزونه فعال دي. د اسلامي امارت له راتګ څخه وړاندې افغان پوسټ کې ۸ ډوله خدمات وړاندې کېدل، خو اوس ۲۰ ډوله خدمتونه وړاندې کوي.»
ننګرهار مېشتي د افغان پوسټ له خوا د دا ډول خدماتو پیل ته خوښ دي، خو ټینګار کوي چې په ټولو دولتي او خصوصي ادارو کې باید مراجعینو ته اسانتیاوې برابرې شي.
د ننګرهار اوسېدونکی عابد وايي: « دا چې افغان پوسټ موږ ته د اسنادو رسولو خدمات پیل کړي، موږ له دې ډېر خوښ یو. پخوا به موږ د خپلو تحصیلي، هویتي او نورو اسنادو لپاره کابل ته تلو، هم ډېر وخت او هم ډېر لګښتونه پرې راتلل.»
د ننګرهار اوسېدونکی صاحب الله وايي: « مخکې به خلک له ډېرو ستونزو سره مخ وو، ځکه دوی به پسته خانو، وزارتونو او نورو ځایونو ته خپله پسې ګرځېدل؛ کله نا کله به اسناد هم ورک شول. دا یو ډېر ښه ګام دی، هیله ده حکومت نور هم دا ډول ښه ګامونه پورته کړي.»
د خلکو په باور، که په ټولو دولتي او خصوصي ادارو کې کارونه الکټرونیکي او د اسنادو انتقال په برخه کې اسانتیاوې رامنځته شي، نو دې سره به هم خلک خپلو کارونو ته پر وخت رسېدنه وکړي او هم به د خپلو اسنادو د پروسېس لپاره له ډېرو لګښتونو خلاص شي.
