شاوخوا يوه مياشت کېږي چې پاکستان ظاهراً له اسلامي امارت سره د وروستۍ لانجې له امله د دواړو هېوادونو ترمنځ د سوداګرۍ او تګ راتګ ټولې ځمکنۍ لارې تړلې دي او په دې توګه يې د ميليونونو ډالرو په ارزښت سوداګرو ته زيان اړولی.
د افغانستان او پاکستان د سوداګرۍ ګډې خونې معلومات ښيي چې په دې موده کې سوداګرو ته شاوخوا ۱۰۰ميليون ډالره زيان رسېدلی. له دې سره، د يو میليارد ډالرو په ارزښت په توکو بار ۲زره موټر لا هم د پاکستان له لوري د فرضي کرښې دواړو خواوو ته ایسار کړای شوي دي.
د افغانستان او پاکستان د سوداګرۍ ګډې خونې ریيس خان جان الکوزی وايي: « زموږ د کره شمېرو له مخې، په تېره یوه میاشت کې ۱۰۰ میلیون ډالره د افغانستان او پاکستان خصوصي سکټور ته زیان رسېدلی. همدارنګه، موږ له پاکستان سره د میاشتې ۲۰۰ میلیون ډالره تجارت او راکړه ورکړه لرو، خو اوس دا راکړه ورکړه په ټپه درېدلې؛ دا په خپله لوی زیان دی.»
د نوموړي په خبره، افغانستان او پاکستان په مياشتني ډول د شاوخوا۲۰۰ ميليون ډالرو په ارزښت سوداګري لري چې اوس دا سوداګري د پاکستان د پرېکړې له امله په ټپه ولاړه ده.
د تازه مېوو کاروباريان او پلورونکي هم د اوښتي زيان له امله اندېښمن دي او له حکومت غواړي چې له پاکستان سره د لارو خلاصولو په اړه جدي هڅې وکړي.
د تازه مېوو یو تن کاروباري وايي: « د دې مڼو د هر من[۷ کیلو] بیه ۱۸۰ افغانۍ وه، خو موږ یې اوس یوازې په ۹۰ افغانیو خرڅوو. دا نورې مڼې موږ په ۱۵۰ افغانۍ خرڅولې، خو اوس یې په ۱۰۰ افغانۍ پلورو. د بازار وضعیت خراب دی، ځکه ځینې مېوې له تورخم او نورو ځایونو را وګرځېدې، ځکه ارزانه شوې.»
د تازه مېوو یو تن کاروباري وايي: « د مېوو د کاروبار وضعیت خراب دی. تاسو وګورئ د دې مڼو خروار له ۱۵ تر ۲۰ زره افغانیو و، خو اوس په ۱۰ زره دی، حتا د سرې مڼې تر ۸ زرو پورې پلورل کېږي، حال دا چې تېر کال تر ۱۴ زرو پورې خرڅېدې.»
د کندهار اوسېدونکی نعمتالله د پاکستان له لوري د لارو بندښت اړ کړی چې پېرلي انار د پلور لپاره کابل ته راوړي، خو وايي د انارو ډېره برخه یې خراب شوي او د ګټې تمه نه شي کولی.
نعمت الله زیاتوي: « انار ډېر دي خو لارې بندې دي او موږ ته تاوان کوي. د خلکو او بڼوالو پيسې را باندې دي، خو زه دومره نه لرم چې د دوی قرضونه ورکړم. زموږ هر یوه سوداګر ته له ۱۰ تر ۳۰ میلیونه افغانیو زیان رسېږي.»
له پاکستان سره د لارو خلاصولو په اړه د صنعت او سوداګرۍ وزارت زموږ اړيکو ته ځواب را نه کړ، خو د افغانستان او پاکستان د سوداګرۍ په ټپه ولاړ وضعيت ته په کتو، ځينې سوداګر وړانديز کوي چې پاکستان دې د لنډ مهال لپاره د کرښې دواړو غاړو ته ولاړو لاریو او بار لېږدونکو موټرو ته د تګ راتګ اجازه ورکړي، ترڅو سوداګرو د لا زيانمنېدو مخنيوی وشي.
