د ټولګټو وزارت یو پلاوی د پکتیا ولایت ته تللی او هلته یې د احمد اخېلو، اریوب ځاځیو او میرزاکې ولسوالیو کې د یو شمېر نیمګړو پروژو لېدنه کړې.
یاد وزارت وايي، پکتیا کې د نیمګړو پروژ ارزونه پیل شوې او راتلونکي کال به د هغه پروژو چارې پیل شي،چې کیفیت یې ښه وي.
د ټولګټو وزارت استازی حجت الله عباس وايي:« د اندراب ، نړیوال بانک ، اسیایي بانک ، فیمو او حفظ او مراقبت پژوژې په دې پنځو کټګوریو کې ارزو. وروسته پرې وزارت تصمیم نیسي او چارې یې پیل کوو.»
د پکتیا ټولګټو ریاست مشر عبدالمتین حماس وایي، د ګردیز ـ پټان ، ګردیز زرمت او احمدخیلو ـ اریوب ځاځیو سړکونو جوړولو یې لوړمړیتوب دی او راتلونکی کال به یې د جوړیدو چارې پیل شي .
حماس زیاته کړه:« د پټان ـ ګردیز سړک باید جوړ شي دا مو لومړیتوب دی او تر څنګ یې د زرمت او احمدخیلو او اریوب ځاځیو سړکونه دي،چې ان شاالله راتلونکی کال به پرې کارونه پیل کړو.»
د اریوب او احمدخیلو ولسوالیو یو شمیر اوسېدونکي بیا وايي،څو ځله یې د سړک او ځینو نورو پروژو سروې او ارزونه ترسره شوې،خو عملي کار پرې نه دی پیل شوی .
د احمد خېلو ولسوالۍ یو تن اوسېدونکی وايي:« سړکونه مو خراب دي،څو ځله احمدخېلو ولسوالۍ کې د سړکونو او نورو پروژو ارزونه او سروې شوې،خو تر اوسه پورې مو عملي کار نه دی لیدلی،چې پیل شوی وي.»
د اریوب ځاځيو ولسوالۍ یو تن اوسېدونکی بیا وايي:« موږ اریوب ځاځیو ولسوالیۍ کې د بندونو،سربندونو ، کاریزونو او استنادي دیوالونو برخه کې کار ته اړتیا لرو او باید کارونه راته ترسره شي.»
د ټولګټو چارو وزارت پلاوی وایي، احمدخېلو ، میرزاکې او اریوب ځاځیو ولسوالیو کې د یو شمیر شرکتونو کار ورته د منلو نه دی او راتلونکی کال به یې په ښه کیفیت پیل کړي.
