ټاکل شوې نن پنج شنبه يو ځل بيا ترکیه کې د افغانستان او پاکستان پوځي رژيم ترمنځ د درېيم پړاو مذاکرات پيل شي.
دا ځل یې له تېر دويم پړاو سره توپير په دې کې دی چې په کې به د دواړو هېوادونو د لوړې کچې پلاوي ګډون وکړي او پر يو لړ مسايلو د هوکړې احتمال شته.
شمشاد ته د حکومت یوې سرچينې منلې چې د دواړو هېوادونو ترمنځ په درېيم پړاو مذاکراتو کې به د افغانستان پلاوي مشري د استخباراتو عمومي ریيس عبدالحق وثيق کوي او دغه راز به د پاکستان استخبارتي ادارې ریيس عاصم ملک د مقابل لوري مشري پر غاړه ولري.
سرچینه په دې اړه وايي: « دا ځل د افغانستان او پاکستان ترمنځ په استانبول کې د مذاکراتو مشري د افغانستان او پاکستان د استخباراتو مشران کوي. د افغانستان پلاوي مشري د استخباراتو عمومي ریيس مولوي عبدالحق وثیق او د پاکستاني پلاوي مشري به د دې هېواد د استخباراتو ریيس عاصم ملک کوي. د مذاکراتو دا پړاو د پنج شنبې په ورځ په استانبول کې پیل کېږي.»
داسې راپورونه هم ورکړل شوي چې د دواړو هېوادونو ترمنځ د مذاکراتو په دويم پړاو کې پاکستاني پلاوي د پرېکړې صلاحيت نه درلود، خو شنونکي په دې نوي پيلېدونکي پړاو کې پر يوه مکانېزم د سلا کېدو تمه لري.
د سیاسي چارو شنونکی نجیبالله هوتک وايي: « دوی کولی شي په افغانستان د پاکستان د لاسوهنو او نامشروع غوښتنو په تړاو شته اسناد د هغوی مخې ته کېږدي. په مذاکراتو کې د پاکستان ټیم هم باید دغې مداخلې ته د پای ټکی کېږي. جګړه د حل لاره نه ده او دواړه هېوادونه په کې زیان ویني، نو باید هڅه وشي چې د خبرو اترو له لارې یوه حل لاره ورته پيدا شي.»
ځينې نور شنونکي د خبرو له لارې د ستونزو حل په اړه د حکومت د دريځ ملاتړ ترڅنګ غوښتنه کوي چې د درېيم پړاو مذاکراتو په نتيجه کې دې د کېدونکو ژمنو په اړه له پاکستان تضمين واخيستل شي.
د چارو شنونکی توریالی همت وايي: « اسلام دا وايي چې په سوله کې خیر دی، همدارنګه واقعیت هم همدا دی چې چېرته جګړه وي هلته ستونزې وې، لارې بندېږي، تجارت په درېږي. یوازې تېر شلو ورځو کې دواړو غاړو ته سل میلیون ډالره زیان اوښتی.»
د راپورونو له مخې، د افغانستان پلاوي د مذاکراتو په دويم پړاو کې له پاکستانه د تضمين غوښته دا وه چې خاوره او هوايي حريم به يې د افغانستان پر وړاندې د بريدونو لپاره نه کارول کېږي، خو له دې کار د پاکستان شاتګ د دې سبب شو چې مذاکرات اوږده او پايله يې ډېره احساسېدونکې نه وي.
