په دوحه کې د افغانستان او پاکستان ترمنځ د اوربند له هوکړې وروسته د پاکستان دفاع وزير ادعا وکړه چې په دې هوکړه کې داسې پټ ضمايم هم شته چې ښکاره کېدای نه شي.
دې خبرو ته د اسلامي امارت وياند هم غبرګون ښودلی او له شمشاد سره په يوه مرکه کې وايي، د هوکړې له لاسليک سره سم په کې ذکر شوي ټول موارد علني شوي او هېڅ پټ ضمایم نه دي پاتې. د مجاهد په خبره، د هوکړې تمرکز د شخړو پر نه کولو، امنيت خونديتوب، دايمي اوربند او د خبرو له لارې د ستونزو پر حل دی.
د اسلامي امارت ویاند ذبیح الله مجاهد وايي: « فکر نه کوم کوم شی د پټ پاتې وي، کومه محتوا چې په تړون کې وه هغه اعلان شوه؛ خو د متن لپاره باید انتظار پاتې شو، ځکه چې هغه تکمیل شوی نه دی، دویمه ناسته لا پاتې ده او هغه موارد به په کې ځای پرځای کېږي چې لا پاتې دي او بحث پرې نه دی شوی. دا ناسته د اکټوبر په ۲۵ مه د ترکیې په استانبول کې کېږي. موږ په کې څه موارد نه وینو، د توافق نامې متن ډېر عادي دی او هغه څه چې موږ نشر کړي، هماغه دي چې د توافقنامې په محتوا کې دي.»
مجاهد دا هم وايي چې له پاکستان سره د شوې هوکړې تطبيقي مکانېزم بشپړ شوی نه دی بلکې په خبره يې، په دې اړه پاتې مسايلو به د ترکيې په کوربه توب په دويمه ناسته کې بحث وشي.
د اسلامي امارت ویاند په دې اړه وايي: « د استانبول ناسته ښايي د وزیر په کچه نه وي بلکې په ټیټه کچه وي؛ ځکه هلته تخنیکي بحث دی او په دې تمرکز کوي چې د کوم مکانیزم له مخې دا پروسه وڅارل شي او لپاره یې کمېټه جوړه شي. دا خبرې به هغه مجلس ته پرېږدو، خو دا مجلس به د تړون مکمل وي او د دواړو هېوادونو ترمنځ به د شوې توافقنامې بشپړتیا وي او هغه وروسته به عملي ګامونه اخیستل کېږي. مانا دا چې ستونزې پېښې نه شي او دواړه هېوادونه په سوله، ارامۍ او ثبات کې په یوه واحد مسیر حرکت وکړي.»
مجاهد يو وار بيا د پاکستان په پوځ کې مشخصه کړۍ د کابل او اسلاماباد د اړيکو خرابولو عامل ګڼي او له وضاحت پرته زياتوي چې ياده کړۍ دا کار د ځينو قدرتونو په اشارې کوي.
ذبیح الله مجاهد زیاتوي: « زه فکر کوم دا حلقه خپلې شخصي منافع پالي، د دواړو هېوادونو ګټې، د پاکستان او پاکستاني ولس ګټې د خپلو ګټو قرباني کوي. یا دا ده چې دوی له لویو قدرتونو نه دستور اخلي او د هغوی په امر دا کار کوي. د سلیم عقل لرونکي او هغوی چې په سیاست کې یې یوه ورځ هم تېره کړې وي، په دې پوهېږي چې د افغانستان او پاکستان اړیکې په مثبت لوري کې څومره ګټورې او په منفي لوري کې څومره زیان لري؛ خو دا چې دا حلقه ستونزه نه درک کوي، مانا یې دا ده چې دا حلقه مجبوره ده، یا د خپلو نفسي خواهشاتو له امله مجبوره ده او یا د باندني حکم په اساس.»
له دې مخکې د ملي دفاع وزیر له دوحې څخه په انلاین خبري کنفرانس کې ويلي وو چې هېچا ته د افغانستان حريم د نقض او امنيت ګډوډولو اجازه نه ورکول کېږي او د دې ترڅنګ يې ډاډ ورکړی و چې له پاکستان سره د هوکړې پرمهال د ډيورنډ فرضي کرښې په اړوند مسايلو بحث نه دی شوی.
