ترکمنستان:له افغانستان سره ښه ګاونډیتوب پالو 

په هرات کې د ترکمنستان کونسلګرۍ د يوې خبرپاڼې  په خپرولو سره ويلي، يو شمير رسنيو د جنورۍ په درېيمه د افغانستان او ترکمنستان د ګډې پولې په اړه نا اثبات شوي او ناسم راپورونه خپاره کړې دي.

یادې کونسلګرۍ ویلي، هېواد يې د افغانستان په چارو کې لاسوهنه نه کوي او خپلې بې طرفۍ ته په کتو د افغانستان سره خپل د ګاونډيتوب او حسن نيت اړيکو ته دوام ورکوي.

خبرپاڼه کې وړاندې ویل شوي، ترکمنستان له افغانستان سره خپل ګډه پوله د دواړو هېوادونو ترمنځ د دوستی پوله بولي او د سرغړونې فکر نه لري.

خبرپاڼه زیاتوي، د دواړو هيوادونو ترمنځ پر ګډه پوله د ارام وضعيت د ساتلو لپاره پیاوړې هوکړه موجوده ده.

د افغانستان د بهرنیو چارو وزارت هم له ترکمنستان سره پر پوله د شخړې په اړه خپاره شوي خبرونه ناسم بللي دي.

د بهرنیو چارو وزارت ویاند عبدالقهار بلخي ویلي، له ګاونډي هېواد ترکمنستان سره کومه ستونزه نه شته دی او له ديپلوماتيکو لارو غواړي،دوست هېواد او د نړۍ ټولو هېوادونو سره رغنده او مثبتې اړيکې ولري.