وروسته له هغې چې افغان ځواکونو پر پاکستاني ځواکونو او پوستو انتقامي بریدونه وکړل، پاکستان له افغانستان سره ټولې لارې د هر ډول تګ راتک پر مخ وتړلې.
د کندهار سیمه ییز مسوولین وايي، پاکستاني لوري د سپین بولدک ـ چمن لاره هم تړلې ده.
د کندهار سپین بولدک ولسوالۍ د عامه اړیکو مسول حافظ حقمل وايي: « دا لاره د یکشنبې ورځې له سهار راهیسې د پاکستان له خوا تړل شوې مګر د افغانستان اسلامي امارت له خوا هېڅ ډول مشکل نه شته. پخوا به چې لاره بنده شوه، لږترلږه مهاجرین به راتلل، خو دا ځل یې د مهاجرینو پر وړاندې هم تړلې ده.»
د سپين بولدک- چمن پر دروازه هر ورځ سلګونه کاروباریان، سوداګر، ناروغان او نور مسافر تګ راتګ کوي. له دې لارې پاکستان ته تلونکي افغانان په عادي ورځو کې هم د پاکستاني پولیسو له بد چلن شکایت کوي.
سپين بولدک ولسوالۍ کې پاکستان ته تلونکی مسافر وایي، د دروازې بندېدو له زیاتو ستونزو سره مخ کړي او له پاکستاني لوري غواړي چې دا ستونزه ژره تر ژره حل کړي.
پاکستان ته تلونکی مسافر خدای نور وايي: « له ماسره ناروغ دی او غواړم کراچۍ ته یې یوسم. په ډېر تکلیف مې پاسپورټونه او وېزې ترلاسه کړې، خو اوس لاره بنده ده او له بلې خوا زموږ ناروغ سخت په عذاب دی. زه غوښتنه کوم چې دا لاره ژر خلاصه شي، ترڅو ناروغان تر ډاکټر پورې ورسول شي.»
مسافر محمد ابراهیم وايي: « زه له هلمند څخه راغلی یم، د پاکستان وېزه هم لرم، دلته لاره بنده ده. موږ په نظامي مسایلو کار نه لرو مګر د ملکي وګړو پر مخ باید لارې ونه تړل شي.»
مسافر شفیع الله وايي: « زه له تخار څخه راغلی یم، مور مې ناروغه ده او په پاکستان کې یې روغتون ته وړم. اوس دلته لاره بنده ده او له ګڼو مشکلاتو سره مخ یم.»
د مسافرو ترڅنګ، دا مهال دواړو غاړو ته سلګونه بار لېږدونکي موټر هم ولاړ دي او همداراز هغې غاړې ته افغان کډوال افغانستان ته د اوښتو په تمه ناست دي.
د کندهار سوداګرۍ خونه وايي، د سپین بولدک او چمن ترمنځ لارې تړل کېدو له امله دواړو غاړو ته په وچو او تازه مېوو، سبزیجاتو، خوراکي توکو او نورو اموالو بار سلګونه لارۍ ولاړې دي.
د سوداګرو په وینا، د سپین بولدک او چمن ترمنځ لار که ژر خلاصه نه شي، میوې او نور توکي به خراب او درانه زیانونه په ځای پاتې شي.
