د افغانستان اسلامي امارت د ویاند مرستیال بلال کریمي د امریکا هغه ادعا بې بنسټه وبلله،چې ګواکې د کابل د تخلیې ماموریت پر مهال پر کابل هوایي ډګر داعش بریدګر د طالبانو لخوا د بګرام له زندانه آزاد شوی و.
کریمي وايي، د اګست شپږویشتمې بریدګر د دوی لخوا نه دی آزاد شوی او په وینا یې، مخکې له هغې چې اسلامي امارت پر زندانونو واکمن شي، د داعش اړوند ټول زندانیان له زندانونو آزاد شوي وو.
کریمي زیاته کړه، دوی بیا هم هڅې کړي،چې له زندانونو تښتېدلي داعش بندیان یا ونیسي او یا یې هم له منځه یوسي.
کریمي وايي:« دا ادعا چې ګواکې د اګست پر ۲۶ پر هوایي دګر بریدکونکی له بګرام زندانه خوشي شوی و، سمه نه ده. په دې اړه هیڅ ثبوت شتون نه لري. د بګرام زندان له ماتېدو او په هوایي ډګر برید تر منځ د وخت موده ډېره کمه وه، ممکنه نه وه،چې په دومره لږه موده کې له زندانه راخوشي شوی کس داسي لوی برید ترسره کړي.»
