په خبرپاڼه کې وړاندې راغلي،چې د افغانستان لپاره د یونیسف د ځانګړي استازي عبدالقادر له خولې لیکل شوي، باید له افغانستان سره ژر تر ژره بشري مرستې وشي.
عبدالقادر روان ژمی ډېر سخت بللی او په وینا یې که افغان ماشومانو ته رسېدنه ونه شي،ډېری ماشومان به د راتلونکي پسرلي له لیدو محروم شي.
هغه زیاته کړې:« که موږ بېړه ونه کړو،همغږي ونه کړو او افغانستان ته لا زیاتې نغدې پیسې او د ژمي توکي ونه لېږو، نو لرې به نه وي،چې د دغه هېواد ماشومان به د راتلونکي پسرلي له لېدو محروم شي.»
د یونیسف اجرائیه مشرې هېنېریټا فور هم ټینګار کړی دی،چې د افغان ماشومانو روغتیايي او امنیتي ستونزې باید له پامه ونه غورځول شي او څومره چې د نړیوالو وس رسېږي،باید ملاتړ یې وکړي.
هغې زیاته کړې:« د هر کال په تېرېدو سره جګړې دوام کوي او ورسره د ماشومانو حقونو او روغتیا ته ډارېدونکې بې پروایي زیاتیږي. ماشومان دا مهال په ستونزه کې دي او د بې پروایۍ له امله مړه کېږي، نو د دغو ماشومانو د ژغورلو لپاره باید هېڅ ډول مرستې ونه سپمول شي.»
