د امريکا ولسمشر د افغانستان په اړه له تېرو لانجمنو خبرو لږ وروسته، د امريکا سمندري ځواکونو د ۲۵۰مې کاليزې په مراسمو کې يو وار بيا د افغانستان په اړه څرګندونې کړې.
دونالډ ټرمپ وايلي، امريکا په افغانستان کې جګړه ګټلی شوه، خو په خبره يې د خپلو سياسي ملحوظاتو له امله يې دغه هدف ترلاسه نه کړ.
له دې څرګندونو وړاندې د بګرام پوځي اډې په اړه د ټرمپ څرګندونو د افغانستان حکومت غبرګون ښودلو ته اړ کړ، خو تازه نوموړي بيا تکرار کړې چې د بګرام اډه به بېرته ترلاسه کوي.
د امریکا ولسمشر ډونالډ ټرمپ ویلي: « تاسو پوهېږی موږ د بریا لپاره جګړه بنده کړه. موږ به په اسانۍ سره په افغانستان کې بریالي شوي وای او حتا په هره بله جګړه کې، خو سیاست مخې ته راغی او ټینګار دا وه چې باید ورو ورو مخکې لاړ شو.»
د سیاسي چارو شنونکي وایي، امریکا د مقاومت په پایله کې ومنله چې له دوو لسيزو وروسته په افغانستان کې خپل حضور صفر کړي او په خبره يې اوس اړتيا ده چې د افغانستان له حکومت سره تعامل غوره شي.
د سیاسي چارو کارپوه محمد سلیم پیګیر وايي: « دا نظامي فشار دی چې سیاسي پرېکړې منځته راوړي. د افغانستان خلکو په تېرو شلو کالو کې مقاومت، جهاد او جګړه وکړل، امریکا یې په ګونډو او ماته کړه او بالاخره یې د خبرو مېز ته کېنوله.»
د پوځي چارو کارپوه اسدالله ندیم وايي: « د افغانستان په اړه د ټرامپ سیاست لا رسانه يي دی او اجرائیوي کانالونو ته نه دی ننوتی. کله چې دا سیاست عملي بڼه خپله کړي، هغه وخت باید وویل چې پر وړاندې یې څه ډول غبرګون باید وښودل شي. د افغان دولت مشرتابه باید هر هغه سیاست په پام کې ولري چې د افغانستان ګټې خوندي کوي.»
د افغانستان اوسنی حکومت په دې تړاو څه نه وایي، خو وړاندې يې ويلي و چې حاکميت يې او د افغانستان ځمکنۍ بشپړتيا ورته لومړيتوب لري.
ځيني نور شنونکي بیا په افغانستان کې د امریکا تېر شل کلن حضور ناکام ګڼي او د ټرمپ اوسنۍ او پخوانۍ څرګندونې پر اوسني حکومت د فشار راوړلو هڅې ګڼي.
د سیاسي چارو شنونکی عزیز معارج وايي: « ټرمپ دا خبرې د روسیې له وېرې کوي، ځکه هغوی اسلامي امارت په رسمیت پېژندلی او د مسکو فارمټ غونډې جوړوي. دوی د دې پر وړاندې د بګرام خبره کوي. اوس چې وايي جګړه یې ګټلی شوای خو د سیاسي موخو لپاره یې ونه ګټله، دا هسې خبرې دي او دوی په دې پوهېدل چې نور دا جګړه نه شي ګټلی. بل لامل یې دا و چې د اوکراین او منځني ختیځ د جګړو لپاره دوی له افغانستان په ډېره بېړه او بې تدبیره ووتل.»
له دې وړاندې چین، ایران او روسیې هم د بګرام هوایي اډې په اړه د ډونالډ ټرمپ څرګندونو ته غبرګون کې ويلي و چې واشنګټن له تېر څخه په تجربې سره د خپل ملي حاکميت په اړه د افغانانو مبارزه درک کولی شي.
