ټاکل شوې نن د اکټوبر په ۷ مه د افغانستان په اړه د سیمې هېوادونو ترمنځ د همغږۍ، ثبات، امنیت او افغان سولې پر مسایلو د خبرو اترو په موخه د مسکو فارمټ ناسته وشي. په دې ناسته کې د افغانستان په ګډون د پاکستان، ایران، هند، چین، اوزبېکستان، تاجیکستان، ترکمنستان او قزاقستان هېوادونو استازي ګډون کوي.
واک ته د اسلامي امارت له رسېدو وروسته دا لومړی ځل دی چې مسکو فارمټ ناسته کې د افغانستان استازي ته د غونډې ناظر په ځای، د ګډون رسمي بلنه ورکړل شوې.
د چارو شنونکي مسکو ناسته کې د افغانستان د استازي رسمي ګډون ستاینه کوي او په خبره یې، دا ناسته له سیمه ییزو او ګاونډیو هېوادونو سره د باور فضا رامنځته کولو برخه کې ګټوره تمامېدای شي.
د نړیوالو اړیکو کارپوه نجیبالرحمان شمال وايي: « دا ناسته کولی شي د مسکو فارمټ غړیو هېوادونو سره چې اکثریت یې د افغانستان ګاونډیان دي، ښې اقتصادي او تجارتي اړیکې جوړې کړي. زه تمه لرم چې د افغانستان حکومت په خپل جوړښت کې د بدلونونو په راوړلو سره د سیمې او په ځانګړې توګه د مسکو فارمټ غړیو هېوادونو باور ترلاسه کړي.»
د چارو شنونکی زلمی افغانیار وايي: « دا چې له څلورو کالو وروسته د لومړي ځل لپاره مسکو فارمټ ناسته کې د افغانستان سیاسي استازی او هغه هم د بهرنیو چارو وزیر ګډون کوي، ډېر مهم ګام دی؛ ځکه چې د مسکو فارمټ غړي هېوادونه د هغو هېوادونو له ډلې چې افغانستان ته یې د انتقاد ګوته نیولې. کله چې د افغانستان استازی په دې ناسته کې ګډون ولري، ښکاره خبره ده چې د کمزورتیا او پياوړتیا پر ټکو به بحث کېږي.»
یو شمېر نور شنونکي بیا مسکو ناسته کې د بهرنیو چارو وزیر رسمي ګډون د اسلامي امارت رسمیت پېژندلو ته د نېږدې کېدو یو نوی ګام بولي او غوښتنه کوي چې حکومت دې له رامنځته شویو فرصتونو ښه ګټه واخلي.
د سیاسي چارو شنونکی شهسوار سنګروال وايي: « افغانستان اوس له یوه ښه موقف څخه برخمن دی؛ په دې هیله چې اسلامي امارت ترې ښه ګټه پورته کړي. له یوې خوا د نړۍ له یوه بل ستر هېواد هندوستان سره په اړیکو کې ښه پرمختګ روان دی او بله دا چې د افغانستان په تړاو نړۍ ته ناسم ور ښکاره شوی تصویر به په دې ناسته کې روښانه شي.»
مسکو فارمټ ناستې په ۲۰۱۷ کال کې د روسیې له خوا پیل شوې او هر کال د یاد هېواد له لوري د سیمه ییزو هېوادونو د استازو په ګډون ترسره کېږي.
په سږنۍ ناسته کې به د اسلامي امارت پلاوی له ګډون سربېره د دې غونډې په څنډه کې د روسیې د بهرنیو چارو له وزیر سرګي لاوروف سره هم خبرې ولري.
د راپورونو له مخې، د پاکستان، ایران، چین او روسیې هېوادونو ځانګړو استازو وار له مخه په مسکو کې د افغانستان پر وضعیت خبرې کړې او افغانستان کې یې د هر ډول بهرنیو پوځي اډو له جوړولو سره مخالفت څرګند کړی.
