د پکتیکا مرکز ښرنې یو شمير اوسېدونکي او کاروباریان وايي، له وارداتي برېښنا سره د دې ولایت نه نښلېدل او دغه راز د خصوصي شرکتونو له خوا د برېښنا لوړو بیو، پر صنعتي کاروبار او د دې ولایت پر پراختیا منفي اغېز کړی.
دوی زیاتوي، که د برېښنا بيې را ټیتي شي او یا ښاریانو ته د منظمې دولتي برېښنا اسانتیاوې برابري او له امله به یې ګڼې ستونزې هوارې او پرمختګ ته زمینه برابره شي.
د پکتیکا ولایت یو تن اوسېدونکی وايي: « موږ له سولري تختو ګټه اخلو، خو دا هم قېمته تمامېږي او داسې کار نه راکوي لکه څرنګه چې موږ اړتیا ده. له دولت دا هیله لرو چې موږ ته هم د برېښنا امکانات راکړي.»
د پکتیکا یو بل اوسېدونکی وايي: « موږ ته د برېښنا دومره لوړ بېل راځي چې زموږ له ګټې یې اندازه لوړه شوي. یوازې څلورو ساعتونو برېښنا لپاره هره ورځ تر ۲۰۰ افغانیو بېل راځي.»
بل پلو، په دې ولایت کې د برېښنا پلورونکي شرکت مسوولین وايي، د دوی زیاتو لګښتونو او خلکو ته د هغوی د اړتیا وړ برېښنا رسولو په برخه کې د نورو ولایتونو په پرتله دا مهال ټیټ قېمتونه کاروي، خو یاده برخه کې د ستونزو د حل ډاډ هم ورکوي.
د برېښنا پلورونکي خصوصي شرکت مسوول نېک محمد مخلص وايي: « زموږ د برېښنا قېمت د ټول افغانستان په کچه د خصوصي شرکتونو قېمتونو ته ارزانه دي، خو بیا هم موږ هڅه کوو چې برېښنا ارزانه کړو. د دې میاشتې لپاره زموږ في کیلواټ بیه ۴۵ افغانۍ ده؛ موږ د شبکې د پراخولو او بیې ټیټولو هڅه کوو.»
په ورته مهال، مسوولین هم مني چې د خصوصي شرکت د برېښنا بيي او لګښتونه لوړ دي، خو زیاتوي چې دوی په دې هڅه کې دي چې له خپلو امکاناتو په کار اخستلو او د خصوصي پانګوالو په پانګونې سره، په دې ولایت کې د برېښنا ستونزه حل کړي.
د پکتیکا ولایت برېښنا آمر محمد ایوب شاه خواجه وايي: « تمه شته چې له یوې خوا د دولت پاملرنه او له بلې خوا د خصوصي پانګوالو پاملرنه راجلب کړو. زه ډاډ ورکوم چې په ډېر نږدې وخت کې به د پکتیکا ولایت د برېښنا ستونزه هواره شي.»
پکتیکا د هېواد په سویل ختيځ کې د ځمکنۍ پراختیا له پلوه پراخ او د نفوسو له پلوه ګڼ میشتی ولایت دی چې د برېښنا په نه شتوالي سربیره يې ولسونه، بیارغوونې، روغتیا، معارف او ګڼو نورو برخو کې ډېر کار او زیاتې پاملرنې ته اړتیا لري.
