د افغانستان بهرنیو چارو وزارت وايي،داسلامي همکاریو سازمان چې خپلې وروستۍ ناسته کې له افغانستان سره د مرستو کومې ژمنې کړي،ډېر ژر به په کابل کې عملي شي.
د یاد وزارت د ستراتیژیکو مطالعاتو مرکز مشر ولي والله شاهین وايي، ددغه سازمان ژمنې دعملي کیدو په حال کې دي او په کابل کې به یې دافغانستان ځانګړی استازی فعالیت پیل کړي .
شاهین وايي، دسعودي عربستان له خوا افغانستان سره ژمنه شوې پيسې به هم په نږدې وخت کې راورسیږي او له دې سره به دافغانستان لپاره جوړ شوی وجهي صندق به داسلامي همکاریو دسازمان دغړو له لوري نور پیا وړی شي.
شاهین زیاته کړه:« د او.ای.سي په کنفرانس کې چې دافغانستان لپاره کومې ژمنې وشوې، هغه دتطبیق په حال کې دي او.ای.سي دافغانستان لپاره ځانګړیاستازی ټاکلی دی او دفتر به یې دلته فعالیږي. کومې پیسې چې دسعودي عربستان له لوري دافغانستان وجهي صندق لپاره ژمنه شوي دي،هغه به هم دلته په مصرف رسیږي. دغه وجهي صندق به دغړو هېوادونو له لوري نور هم تقویه کېږي.»
د افغانستان اسلامي امارت د ویاند مرسیتال بلال کریمي وايي، د اسلامي همکاریو سازمان له غړو هېوادونو سره یې اړیکې شوي دي او تمه لري،چې په لنډه موده کې عملي شي.
کریمي زیاتوي:« هغه کومې ژمنې چې داسلامي همکاریو سازمان له لوري له افغانستان سره شوي دي، وخت پرې لږ وتلی دی او اړېکې ورسره شوي دي. هېله مندي شته،هغه څه چې هلته ژمنې شوې دي، تحقق پیدا کړي.»
د بهرنیو چاور وزارت د ستراتیژیکو مطالعاتو مرکز مشر ولي والله شاهین وايي،دافغانستان په تړاو داسلامي همکاریو سازمان وروستۍ ناسته،چې په اسلاماباد کې جوړه شوې وه،له نورې نړۍ سره یې دکابل اړیکې پراخې کړي او له هغې وروسته دګاونډیو او عربي هېوادونو دیپلوماتان له لوړو ژمنو سره کابل ته تګ راتګ کوي.
شاهین زیاته کړه:« د او. ای. سي کنفرانس له بهر سره دافغانستان دروازې خلاصې کړې، له هغه کنفرانسه وروسته دلته چې کوم میلمانه افغانستان ته راځي،دګاونډیو او دعربي هېوادونو دا میلمانه په لوړ تعداد کې دي او له زیاتو ژمنو سره راځي،چې دافغانستان د راتلونکي په اړه هېله مندي زیاتوي.»
دروانې نوامبر میاشتې په نولسمه نیټه په اسلام اباد کې داسلامي همکاریو سازمان دافغانستان په تړاو ناسته جوړه شوې وه،چې په کې له افغانستان سره د اقتصادي او بشري بحران دمخنیوي په برخه کې دمرستو ژمنه وشوه .
