هدایت الله زرياب چې په جلال اباد ښار کې د انلاین خدمتونو وړاندې کولو روزګار لري وايي، د انټرنېټ او مخابراتي شبکو دوه ورځني بندښت له امله یې کاروبار په ټپه درېدلی و او خپل ټول مشتریان یې له لاسه ورکړي وو.
د ده په خبره، هېواد کې د ډېرو خلکو کاروبار په انټرنېټ پورې تړلی او د دې ډول ناڅاپي ګام پورته خلک له سختو مالي ستونزو سره مخ کولی شي.
د جلال اباد اوسېدونکی هدایت الله زرياب وايي: « زما هغه اړیکې پرې شوې وې چې مشتري یې غوښتنه کوي. زموږ مشتریان یا د وېزو اخیستلو یا هم انلاین بورسونو کې د نوم لیکنې لپاره، دغه راز د پاسپورټ او الکټرونیکي تذکرې د انلاین فورمو ډکولو لپاره راځي. دا ټول کارونه انټرنېټ ته اړتیا لري او له امله یې زموږ ټول کارونه په ټپه درېدلي وو.»
د مخابراتي شبکو او انټرنېټ له دوه ورځني بندښت وروسته، د انټرنېټ په راتګ سره جلال اباد کې د خلکو روزګار بېرته غوړېدلی، خو د بیا بندېدو له امله اندېښنې لا په خپل ځای دي.
خلک وایي، خوښ دي چې بېرته یې روزګار پیل شو او له خپلو دوستانو او کورنیو له غړیو سره په اړیکه کې دي.
د جلال اباد اوسېدونکی درانی وايي: « انټرنېټ ډېر سهولت رامنځته کړی. کله چې بند و، ټول خلک په تاوان کې وو، خو اوس هرڅه سم روان دي. هغه کورنۍ ډېرې په تشویش کې وې چې په بهر کې مسافر لري، همدارنګه د بانکونو کارونه ورسره ولاړ وو.»
یو شمېر نور جلال اباد مېشتي او کاروباریان وایي، د انټرنېټ او مخابراتي شبکو یو ځلي بندښت دوی ډېراندېښمن کړي وو او په خبره یې، فکر يې کاوه چې په حکومتي کچه لوی بدلون راغلی او یا کومه معامله روانه ده، حال دا چې داسې هېڅ کومه خبره نه وه. دوی له حکومت غوښتنه کوي چې له دې ډول ناڅاپي پرېکړو وړاندې ولس ته خبر ورکړي.
د جلال اباد اوسېدونکی خانزاده وايي: « کله چې دا ډول ستونزه رامنځته کېږي، که هغه تخنیکي وي یا سیاسي، باید له ملت سره شریکه شي. د انټرنېټ قطع والي پرمهال ملت په ډېر تیاره حالت کې پروت او دښمن ترې ناوړه ګټه پورته کوله. داسې آوازې او تبلیغات کېدل چې نظام چپه کېږي یا دا چې د امارت د مشرانو ترمنځ اختلافات راغلي، حال دا چې هېڅ خبره نه وه.»
د تېرې دوشنبې په مازیګر ناوخته پرته له کومې مخکینۍ خبرتیا، په ټول هېواد کې انټرنېټي خدمات او مخابراتي اړیکې پرې شوې او له امله یې دوه ورځې خلک له سخت کړاو سره مخ وو.
