په کاپیسا ولایت کې د وړمې شپې ورښتونو او تېزې ږلۍ په څلورو ولسوالیو کې خلکو ته درانه زیانونه اړولي.
ځايي خلک وايي، د انارو باغونه او نور فصلونه یې له منځه تللي او سېلابونو ورته درانه مالي زیانونه او ویجاړی پر ځای پرې اېښی.
د تګاب ولسوالۍ یو تن اوسېدونکی وايي: « زما بڼ یې سل په سلو کې تخریب او له منځه یوړ. د شپې ډېره غټه غټه ږلۍ وشوه او ټول انار یې له منځه یوړل. په دې بڼ کې تر ۱۵۰ زره افغانیو انار وو، خو اوس فکر وکړه چې نور هېڅ هم نه شته.»
یو بل اوسېدونکی وايي: « زموږ پر کلي سېلاب راغی او خلکو ته یې ډېز زیانونه واړول. له حکومت غوښتنه کوو چې زموږ لاسنیوی وکړي.»
تګاب، نجراب، کوهبند او اله سای د کاپیسا ولایت هغه ولسوالۍ دي چې د تېزې ږلۍ ورېدو له امله په کې د انارو او نورو مېوو باغونه زیانمن شوي او بڼوال له حکومت او مرستندویه بنسټونو د مرستې غوښتنه کوي.
د تګاب یو تن اوسیدونکی وايي: « زموږ کور ته هم اوبه راغلې او د انارو باغونه مو له منځه تللي. همدارنګه زموږ کور ته راغلې لارې هم سېلاب وړې دي.»
په ورته مهال، د کاپیسا د اطلاعاتو او فرهنګ رییس کریمالله وثیق وايي، تر دې دمه د مالي زیانونو کره شمېرې نه دي په ډاګه شوې، خو ډېرو بڼوالو ته زیانونه اوښتي.
کریم الله وثیق وايي: « د تګاب، اله سای، نجراب او کوهبند ولسوالۍ ځپل شوې دي، خو ډېر زیانونه په تګاب او اله سای کې اوښتي. په دغو ولسوالیو کې ټول رسېدلي حاصلات تقریبا ً له منځته تللي دي.»
د ږلۍ دا ورښت وړمه شپه دوه بجې پیل شو او له امله یې په نجراب او تګاب ولسوالیو کې سېلابونو را ووتل چې د خلکو کورونه یې زیانمن او ویجاړ کړل. پېښو ته د رسېدنې ریاست چارواکي وايي، زیانمنو شویو سیمو ته د سروې ټیمونه او بیړنۍ مرستې رسېدلې دي.
د کاپیسا ولایت طبیعي پېښو ته د رسېدنې آمر عبدالواسع بارکزی وايي: « په تګاب ولسوالۍ کې کرنیزې ځمکې او د انارو باغونه ویجاړ شوي. زموږ د اضطرار ټیم راغلی او سروې پيل شوې ده. همدارنګه هغو کورونو ته مو خېمې او خوراکي توکي راوړې دي چې په ټولیزه توګه ویجاړ شوي دي. همدارنګه په اله سای او نجراب کې سړکونه هم ویجاړ شوي دي.»
د راوتلیو سېلابونو له امله مواصلاتي لارې، کرنیز حاصلات او کابو لس بابه کورونه په بشپړ ډول له منځه تللي. تګاب، نجراب، کوهبند او اله سای د کاپیسا ولایت هغه ولسوالۍ دي چې د دغو ورښتونو له امله په کې باغونه له منځه تللي او د خلکو کورونه یې زیانمن کړي دي.
