Skip to content
که څه هم د دولتي پوهنتونونو دروازې تړل شوي،خو د هېواد پر کچه د خصوصي پوهنتونونو دروازې پرانیستې دي او زرګونه محصلین په کې زده کړې کوي.
په کابل نن سه شنبه د « ۱۴۰۰ کال د مرغومې پر ۷ » په یوه خصوصي پوهنتون کې د لسګونه محصلینو فراغت غونډه نیول شوې وه.
فراغت غونډه کې د خصوصي پوهنتون مسوولینو له فارغ شویو محصلینو وغوښتل،چې د خپلو خلکو او هېواد لپاره کار وکړي او همداراز یې له اسلامي امارته هم غوښتنه وکړه،چې د دولتي پوهنتونونو دروازې پرانیزي.
د خصوصي پوهنتون مسوول عبدالطیف روشان وايي:« همداسې چې شخصي پوهنتونونو ته اجازه ورکړل شوې ده، هیله من یم،چې دولتي پوهنتونونو ته هم اجازه ورکړل شي،تر څو وکولی شي،پرمختګ او انکشاف کې رغنده ونډه واخلي.»
د محصلینو فراغت غونډه کې د خصوصي پوهنتون مسوولینو ډاډ وښود،چې ډېر ژر به دولتي پوهنتونونه هم بېرته پیل شي،خو په وینا یې دا هرڅه امکاناتو او وخت ته اړتېا لري.
د خصوصي پوهنتون مشر خیبر سیفي وايي:« زموږ دولتي پوهنتونونه یو لړ امکاناتو ته اړتیا لري،نو تاسې ډاډمن اوسئ،چې ډېر ژر به دولتي پوهنتونونه پرانېستل شي او دې برخه کې هېڅ کورنۍ اندېښنه نه لري.»
تازه فارغ شوي محصلین بیا وايي،پوهېږي،چې د مسوولیت کچه یي پراخه شوه او هوډ لري، چې د خپل هېواد او خلکو لپاره کار وکړي.
دوی پر نورو ځوانانو هم غږ وکړ،چې جلاوطنۍ ته دې زړه نه ښه کوي او خپلې وړتیاوې دې د خپل هېواد په بیا ابادولو کې وکاروي.
یو تن تازه فارغ شوی محصل بلال مشعل وايي:« راځئ خپل هېواد کې پاتې شو.هېواد ته کار وکړو او هغه چاته کار وکړو،چې دا څو کاله یې په جنګ کې تېر شوي دي. هغو خلکو ته کار وکړو،چې د پرمختګ تږي دي. هغه چاته کار وکړو،چې پر موږ او تاسې حساب کوي.»
تازه فارغ شوي کسان چې په پنځه مختلفو پوهنځیو کې یې لوړې زده کړې بشپړې کړې، له اسلامي امارته غواړي،چې دندې ورکړي او کار اهل کسانو ته وسپاري.
دوی وایي، اسلامي امارت دې ورته د کار کولو زمینه برابره کړي او دوی چمتو دي،چې خپل هېواد ته کار وکړي.
